वटुया चिकंअतः व क्वयलागल्लीइ कोरोना संक्रमित

येँ– येँ महानगरपालिका २२ वडाय् लाःगु वटुया चिकंअतः छम्ह व क्वय्लागल्लीइ छम्ह यानाः निम्हेसिके कोरोना भाइरस खनेदुगु दु । अथेहे वटुइ हे मेम्ह छम्हेसिके नं कोरोना संक्रमण दुगु खँ वयाच्वंसां उकिया पुष्टि धाःसा मजूनिगु खँ येँ मनपा २२ वडाया अध्यक्ष चिनिकाजी महर्जनं कनादीगु दु । वय्कःया कथं संक्रमण पुष्टि जुइधुंकूपिं निम्ह मध्ये छम्हेसित अस्पताल यंकेधुंकूगु दुसा छम्हेसित अस्पताल यंकेगु तयारी जुयाच्वंगु दु । वडा अध्यक्ष महर्जनं वटुया बजाः बन्द याकेधुनागु खँ धयादीगु दु ।

थुपिं निम्हेसितं थौं कोरोना पोजिटिभ जूगु रिपोर्ट वःगु खः । कोरोनाया लक्षण खनेदयेवं निम्हं स्वन्हु न्ह्यः थःथः हे वनाः स्वाब परीक्षण याकःवंगु खः । आः कोरोना खनेदुपिं निम्हं वटुइ वसः पसः तयाच्वंपिं खः । उपिं मध्ये छम्ह मनमैजु छेँ जुयाच्वंम्ह खःसा छम्ह स्थानीय हे जूगु खँ धाःगु दु ।