बालाजुइ डोजर, स्थानीयपाखें विरोधय् धर्ना

येँ (नेपालभाषा टाइम्स) – बालाजुइ सापारुया इलय् डोजर हयाः स्थानीय जनताया छेँ थुना बिउगु विरुद्ध म्हिगः अन धर्ना बीगु ज्या जुल । उपत्यका सडक विस्तार विरुद्ध संघर्ष समितिया ग्वसालय् अन धर्ना बीगु ज्या जूगु खः । धर्नाय् ‘झीगु छेँ झीगु अस्तित्व’ धकाः च्वयातःगु ब्यानर लिसें हाकुगु ध्वाँये ब्वयेकूगु खः ।

अन म्हीग डोजर हयाः छेँ थुना-च्वंगु इलय् स्थानीय मनूत वनाः विरोध याःगु खःसा प्रहरीं विरोध याःवःपिंत लाठीचार्ज समेत यानाः च्याम्हेसित ज्वना यंकूगु खः । लिपा ज्वंपिंत त्वःतेमाः धकाः धाःवंपिं निम्हेसित नं ज्वना यंकल । उमिसं म्हिगः चौकी दुने हे अनसन च्वनाः विरोध याःगु खः ।

थ्वहे झ्वलय् थौं वंगु चान्हय् न्यागः डोजर हयाः अन च्वंगु निखा छेँ पाःताः जुइक हे थुना बिउगु खः । छेँ थुंगु लिसें कार्यकर्तात ज्वंगु विरोधय् म्हिगः सुथय् प्रदर्शन यायेगु ज्याझ्वः सार्वजनिक जुइवं ज्वनातःपिंत म्हिगः सुथय् त्वःता बिल । तर वय्कःपिंसं थःपिंत बिना पूर्जी ज्वंगु खँय् उजुरी च्वयाः बिलं प्रहरीं उजुरी दर्ता मयाः ।

अनंलि न्हिनय् सलंसः स्थानीयवासी व संघर्ष समितिया कार्यकर्तातय्सं बालाजु लागाय् जुलुस पिकयाः चाःहिलेगु लँय् धर्ना बीगु ज्या याःगु खः । कार्यकर्तातय्सं छेँ थुनेगु ज्याया विरोध यासें स्वनिगःया नेवाःतय्त विस्थापित यायेगु ज्याय् राज्य अझ नं सक्रिय जुयाच्वंगु द्वपं बिउगु खः ।