नेपाःया भिक्षु सुगन्धयात थाईल्याण्डय् उच्च उपाधि

येँ (नेपालभाषा टाइम्स) – थाइल्याण्डय् च्वनाबिज्याइम्ह नेपाःया भिक्षु सुगन्ध महास्थविर (डा. अनिलमान शाक्य) यात थाई जुजु महा जिरालोंकर्नपाखें अनया बौद्ध भिक्षुपिंत प्रदान याइगु उच्चस्तरया विशिष्ट उपाधिपाखें सम्मानित यानादीगु दु। थाइल्याण्डया राजधानी बैंककय् जूगु छगू विशेष ज्याझ्वलय् भिक्षु सुगन्ध महास्थविरयात ‘फ्रा देवशाक्यवंशपण्डित’ धइगु पदवी प्रदान यानादीगु खः ।

थ्व स्वयां न्ह्यः वसपोलयात ‘फ्रा शाक्यवंशविशुद्धी’ धइगु उपाधिं सम्मानित यानातःगु खःसा थुगुसी व स्वयां नं च्वय्या उपाधि लःल्हाःगु खः । थाइल्याण्डय् बौद्ध भिक्षुपिंत राज्यपाखें प्रदान दकलय् सर्वोच्च उपाधि ‘संघराजा’ खः । ‘सोमदेत’ धइगु पदवी कयातःपिं च्याम्ह विशिष्ट भिक्षुपिंपाखें ‘संघराजा’ ल्ययेगु याइ । सोमदेत उपाधि तक थ्यंकेगु लागिं क्वय्या थीथी उपाधि प्राप्त यायां वनेमाः । उकी मध्ये छगू उपाधि ‘देव’ नं खः, गुगु भिक्षु सुगन्धयात प्रदान याःगु खः । थ्वयां लिपा ‘धम्म’, ‘ब्रम्ह’ धइगु उपाधि कायेधुंकल कि ‘सोमदेत’ उपाधिया लिक्क थ्यं वनी । थाइल्याण्डय् थौंकन्हय् परमपूज्य संघराजाया रूपय् फ्रा अरियावंशगतन्नान कायम जुयाच्वंगु दु ।

नेपाःया अखिल नेपाल भिक्षु महासंघया महासचिव भिक्षु कोण्डन्यं थाइल्याण्डय् नेपाःया बौद्ध भिक्षुयात थुलि उच्चस्तरया उपाधि प्राप्त जूगु सकल नेपाःया लागिं हे लसताया खँ खः धयाबिज्याःगु दु। भिक्षु सुगन्ध महास्थविरं बेलायतया क्याम्ब्रिज लगायत अन्तर्राष्ट्रिय विश्वविद्यालयय् धर्म सम्बन्धी विषय ब्वंकेगु नं यानाबिज्याइ ।