सम्पत्तिइ मिसा अधिकार बारे अभिमुखीकरण

थिमि – बाबा बचत तथा ऋण सहकारी संस्था लिमिटेड, थिमिया ग्वसालय् मुलुकी देवानी संहिता २०७४ दुने ब्यवस्था याना तःगु मिसातय्गु सम्पति अधिकारया बारे छगू अभिमुखीकरण ज्याझ्वः जुल । मुलुकी देवानी संहिता २०७४ वंगु भाद्र निसें लागु जुइ धुंकाः थुकी ब्यवस्था यानातःगु मिसातय्गु सम्पति अधिकार बारे ब्यापक थुइकेगु निंतिं थुगु ज्याझ्वः जूगु खः ।

मुक्कं ११० म्ह मिसातय्गु सहभागीता दुगु उगु अभिमुखीकरण ज्याझ्वलय् सम्पति धयागु छु खः, सम्पतिया महत्व, सम्पति अधिकार सोचया विकाशक्रम नापं ब्यावहारीक जीवनय् मिसातय्त वयाच्वंगु समस्या बारे नं न्यनेकने जूगु खः । मिसातय्गु सम्पति अधिकार कानुनय् सुरक्षित यानातःसां जानकारीया म्होतिं यानाः थःगु अधिकार पाखें बन्चित जुइ म्वायेकेत थ्व अभिमुखीकरण यानागु खँ संयोजक डा. रोजी मानन्धरं धयादिल ।

थःगु अधिकारया बारे दुग्यंक ज्ञान काये खनाः तसकं लय्ताःगु खँ सहभागीपिं मध्ये बसन्ती श्रेष्ठं कनादिल ।सहकारीया कानुनी सल्लाहकार व सानिमा लाइफ इन्स्योरेन्सया कानून अधिकृत अधिवक्ता प्रिति श्रेष्ठं अभिमुखीकरण यानादीगु खः ।

वयकलं देवानी संहिताया बारे मिसातय्त जक मखु मिजंतय्त नं जानकारी बिइमाःगु न्ह्यथसें थज्याःगु अभिमुखीकरण ब्यापक यायेमाःगु खँ न्ह्यथनादिल । सहकारी संस्थाया नायः रत्नमान श्रेष्ठं मिसा अधिकारया बारे मिस्तय्त सूसुचित याये दयाः लसता प्वंकादिल ।