ने. सं. ११४४ चौलाथ्व दशमी -

पुनःजीवित निगू पुखू

थिमि (रासस) – सन्ध्या काःई । ई बिना वनाच्वन । जःखः च्याकातःगु मतया जलं पुखू जल्लल थिनाच्वन । बासुरीया यइपुसे च्वंगु धुनं सन्ध्या काःईया लकसयात उत्सवया रुपय् हिला यंकाच्वन । मतया जलं थिनाच्वंगु पुखुलिइ बहनिसिया इलय् नं निगः डुंगा चले जुयाच्वन । पुखूया दुनेपाखे सीमित मनू दुसां पुखूया पिने जःखः स्वयेत स्थानीयवासीया ख्वातुगु उपस्थित दयाच्वन ।

मध्यपुर थिमि नगरपालिका-४ य् च्वंगु स्वसः दँ पुलांगु ऐतिहासिक निगू पुखूया दक्षिणपाखे पुखुलिइ शनिवाः सनिलय् उलेज्याया सत्रय् खने दुगु दृश्य खः थ्व । थिमि बोडेया कमलपुखू व याता पुखूया लः वइकथं करिब ३००दँ न्ह्यः गंगा महारानीं सिँचाइ, मिं नइगु व लःया स्रोतया निंतिं निर्माण याःगु निगू पुखुलिं पुनःर्जीवन काःगुयालिसें मध्यपुर थिमि नगरपालिकाया प्रमुख मदनसुन्दर श्रेष्ठं उलेज्या यानादीगु खः । वि.सं. २०१५ य् तत्कालीन जुजु महेन्द्र ख्वपय् वःगु इलय् वय्कःयात लसकुस यायते लः लिकायेवं निगू पुखुलिइ घाँय् बुयाः ख्यलय् हिउगु खः । २०६५ सालय्न गरपालिकां १० गू लाख खर्च यानाः नया बार तयाः संरक्षणया कुतः याःसां नं छुं दँ थुखे पुखुलिइ वा पायेगु व मेमेगु इलय् मस्त म्हितेगु ख्यःया रुपय् हिला वनाच्वंगु खः ।

ज्याझ्वलय् जनप्रतिनिधिया जिम्मेवारी कःघायेधुंकाः काःगु संकल्प धमाधम पूरा याना वयाच्वनागु नगरप्रमुख श्रेष्ठं ‘निगू पुखू’ उकिया हे ज्वलन्त उदाहरण जूगु धयादिल । नगरपालिकां आ.व. ०७५/७६य् ५० गू लाख बजेट विनियोजन यानाः निरञ्जन श्रेष्ठया अध्यक्षताय् गठन जूगु पुनःनिर्माण तथा गुरुयोजना उपभोक्ता समिति मार्फत पुनःनिर्माण शुरु याःगु खः । मुक्कं १ गू करोड २५ गू लाख लागतय् स्वदँया दुने निर्माण सम्पन्न यायेकथं सुरु जूगुलिइ आर्थिक दँ ०७६/७७ य् छगू करोड २५ गू लाख व बागमति प्रदेशं ५० गू लाख बजेत विनियोजन याःगु नगरप्रमुख श्रेष्ठं जानकारी बियादिसें दक्षिणपाखेया पुखूया पुनःनिर्माण सिधःगु व उत्तरपाखेया तःधंगु पुखूया पुनःनिर्माण ज्या धमाधम जुयाच्वंगु कनादिल ।

पुखूया प्यखेरं मा अप्पा, दाछि अप्पा, अप्पाय् चुना सुर्कीया प्रयोग यानाः पःखालं ग्वयातःगु दुसा पुखूया प्यखेरं कलात्मक ध्वाखा तयातःगु दु। पुखुलिइ क्वय् हाकुचा, दथुइ पँचा व च्वय् हाकनं हाकुचा तयाः १५ इन्च चा व वयां द्यःने अप्पा लानाः लः जायेकातःगु दु। थ्व प्रविधिं पुखुलिइ लः सुना वंके मबीगु जानकारी बियादिसें वय्कलं स्थानीय इनाय् त्वाःया राजगणेशनिसें दिगु भैरव देगःतकया वाति लः मुंकाः प्रशोधन यायेधुंकाः पुखुलिइ क्वफायेगु योजना दुगु कनादिल । निगू पुखू चाःहिले छिंक पैदल मार्गय् च्यागू फल्चा निर्माण जुयाच्वंगु दु ।

ज्याझ्वलय् वडा नं. ४ या वडाअध्यक्ष कुमार श्रेष्ठं निगू पुखू क्षेत्रयात नगरया प्राचीन व ऐतिहासिक संस्कृतिया प्रदर्शनस्थल व पर्यटकीय गन्तव्यया रुपय् विकास यायेगु जानकारी बियादिल । मध्यपुर थिमि दुनेया ऐतिहासिक सम्पदाया संरक्षण व जिर्णोद्वार याना यंकाः ध्याकुनय् लानाच्वंगु क्षेत्रयात पर्यटकीय गन्तव्यया रुपय् न्ह्यःने न्ह्याकेगु जुइ धयादिल ।