जनकपुरय् जुलुस, वीरंगजय् अध्ययन तयारी
येँ (नेपालभाषा टाइम्स) – रामया जन्मभूमि बारे प्रधानमन्त्री केपी शर्मा ओलीं बियादीगु धापूया विरोधय् रामया ससः धयातःगु जनकपुरय् विरोध प्रदर्शन जूगु दु। जनकपुरया साधुसन्ततय्सं प्रम ओलीया धापू अप्रमाणित व धार्मिक भावनाय् घाः लाकी कथंया दु धासें म्हिगः सतकय् वयाः प्रदर्शन याःगु खः । प्रधानमन्त्रीया थ्व धापुतिं यानाः नेपाः व भारत दथुइ जनस्तरय् कायम जुयाच्वंगु स्वापूयात लिच्वः लाकीगु सम्भावना दु धासें अज्याःगु धापू लित कायेमाःगु माग उमिसं याःगु खः ।
प्रदर्शन लिपा जनक चोकय् जूगु सभाय् न्ववासें रामानन्दीय वैष्णव संघया महासचिव नवलकिशोर शरणं प्रधानमन्त्रीया धापुतिं जनस्तरया स्वापू स्यंकीगु खतरा पिहां वःगु बिचाः प्वंकादीगु खः । प्रधानमन्त्री ओलीं येँय् जूगु छगू ज्याझ्वलय् न्ववासें रामायणया पात्र रामया जन्मस्थल भारतया अयोध्या मखु बरु नेपाःया वीरगंजय् च्वंगु ठोरी धाःगु थाय् खः धइगु बिचाः तयादीगु खः ।
थ्वहे झ्वलय् प्रधानमन्त्रीं पर्साय् रामया जन्मभूमि ‘अयोध्यापुरी’ लाः धकाः अभिव्यक्ति बियादीवं नेपाःया पुरातत्व विभागं उगु थासय् उत्खनन् यायेगु तयारी शुरु याःगु दु। प्रधानमन्त्रीं हे अयोध्या नेपालय् लाः धकाः बिचाः तयेधुंकाः नेपाःपाखें उकियात पुष्टि यानाः नं क्यने माःगु जूगुलिं पुरातत्व विभागं उगु थासय् अध्ययन शुरु यायेत्यंगु खँ धाःगु दु। उगु थासय् अध्ययन यायेधुंकाः जक रामया जन्मस्थल अन लाःगु खः कि मखु धाये फइ धासें विभागं थ्व तयारी यायेत्यंगु खँ सीदुगु दु। प्रमया धापू पिहां वयेवं प्रमया धापू सही खः लाकि मखु धाये माल धकाः विभागयात यक्व दबाब लाःगु खँ नं सीदुगु दु ।
LEAVE YOUR COMMENTS