ने. सं. ११४४ चौलाथ्व द्वादशी -

गाजर नयेबलय् झीत छु छु फाइदा जुइ ?

गाजरयात झी म्हासुलैं धायेगु नं चलन दु। गाजर खास यानाः चिकुलाया तरकारि खःसां थ्व दछियंकं हे दु। गाजर नयाया यक्व हे फाइदा दु। थ्व नयेबलय् चाकुसे च्वनीगु जक मखु, थुकी क्यालोरी नं तसकं कम जक दु। गाजर कचिकं नं नयेजिउ, अले थुकियात सूप, सलाद, तरकारि
आदिइ छ्यलेजिउ। चिकुलां गाजरया हलुवा दयेकाः नं नयेगु याः । गाजरया हलुवां नं यक्व हे फाइदा याः ।

गाजर नयाः छिं म्ह दुनेया फोहर सफा यायेफइ । गाजर कचिकं वा मनाः नयेबलय् थुकिं छिगु स्वास्थ्ययात बांलाकातइ । थुकिया नियमित सेवनं सँ, छ्यंगू, मिखाया लिसें म्हया दक्वं अंगयात स्वस्थ जुइकातये फइ । गाजर नयेबलय् झीत मेगु छु छु फाइदा दइ ले ?

क्यान्सरयात पनातइ :
गाजर नयाः छिं थःत क्यान्सर थेंज्याःगु ल्वय्पाखें बचे यानातयेफइ । गाजरय् बीटा-क्यारोटिन दइ, गुकिं क्यान्सरयागु खतरायात कम याइ । बीटा क्यारोटीनयात विशेष कथंया क्यारोटीनोइड नालातःगु दु, गुगु प्रोस्टेट, कोलोन व ब्रेस्ट क्यान्सरलिसे ल्वायेत सफल जू । गाजर नियमित नइपिंत आतापुतिया क्यान्सर जुइगु खतरा २४ प्रतिशत तक कम जुइ । गाजरया सेवनं ल्यूकेमिया (ब्लड क्यान्सर) व प्वाःया क्यान्सरं बचे जुइफइ ।गाजर नयेबलय् हिइ क्यान्सर सेल विकसित जुइ फइमखु ।

नुगःस्येँयात फाइदा :
गाजरय् क्यारोटिनोइड दइगु जूगुलिं थुकिं नुगःस्येँया ल्वगितय्त फाइदा याः । गाजर नयेबलय् कोलेस्टेरोलया लेभल कम जुइ । धयातःगु दु कि छवाःया खुपु गाज। नयेगु यानाच्वन धाःसा नुगःस्येँया ल्वय् जुइ हे मखु। नुगःस्येँ बमलाइगु, नुगःया धुकधुकि तच्वइगु जुल धाःसा गाजर मिइ छुयाः नल धाःसा फाइदा जुइ ।

मस्तय्त फाइदा :
चिधिकःपिं मस्तय् गबलय् वा बुयावयेगु शुरु जुइ, अबलय् इमित गाजरया जूस बरोबर त्वंकातयादिसँ । थुकिं वा अःपुक पिहां वइ । अले मस्तय्त दुरु अःपुक पचे जुइ ।मचा न्यासि वनीगु ई त्यलकि वयात गाजरया जूसय् सन्तरासिया जूस ल्वाकछ्यानाः त्वंकेगु यायेमाः । थुकिं यानाः मचा बल्लाइ, अले याकनं न्यासि वनेफइ । गाजरया जूस न्ह्याबलें ताजा गाजरयागु हे दयेकेमाः, अले तिन्हिनय् त्वंकेगु यायेमाः । जा नयेधुंकाः गाजरया जूस त्वनेमजिउ। अथे हे गाजरया जूस त्वनाः तुरुन्त लिपा हे जा नयेमजिउ ।

मिखायात फाइदा :
गाजरय् भिटामिन व न्यूट्रिएन्टस प्रशस्त मात्राय् दइ । गाजरयात मिखाया निंतिं तसकं फाइदा दुगु चीज धयातःगु दु। गाजरय् बीटा-क्यारोटिन दइ, गुकियात लीभरं भिटामिन ‘ए’ य् हिलाबी । भिटामिन ए रेटिनाया दुने ट्रान्सफर्म जुइ । थुगु प्याजी थें खनेदइगु पिगमेन्टय् थुलि पावर दइ कि थुकिं सँकां (रतन्धो) थेंज्याःगु मिखाय् जुइगु ल्वय्पाखें छितः रक्षा यानातइ । बीटा-क्यारोटिनयात भिटामिन ए या दकलय् बांलाःगु रुप नालातःगु दु। मिखाय् छुं कथंया ल्वय् जुल धाःसा कचिगु गाजर वा उकिया जूस त्वनेबलय् मिखाय् तेज दयावइ, अले मिखाया ल्वय् मदयावनी । थुकिं चश्माया नम्बर क्वकायेत नं ग्वाहालि याइ ।

एनीमिया मजुइकाबी :
थीमजिउ जुइगु इलय् मिसातय् हि मगानाः एनीमिया ल्वय् जुइफु। गाजरय् आइरन प्रशस्त मात्राय् दइ। अथे जुयाः थीमजिउ जुइगु इलय्मि स्तय्त गाजर नयेगु सल्हा बी । गाजरय् भिटामिन ई दइ, गुकिं न्हूगु हि दयेकेत ग्वाहालि याइ। गाजरया सेवनं हि अप्वः दयावइ। अथे जुयाः हि मगाः मजुइकेत एनीमिया ल्वचय् गाजर नयेगु हे यायेमाः । यःसा गाजरया जूस त्वनाबिउसां जिउ ।

थीमजिउ जुइबलय् :
गाजरय् बीटा–क्यारोटिन प्रशस्त दु। थीमज्यू जुइबलय् बीटा-क्यारोटिन दुगु चीज यक्व नयाबिल धाःसा हेभी ब्लड फ्लोयात कम यायेफइ । गाजर न्ह्ययाः नयेगु यात धाःसा थीमजिउ जुइबलय् स्याःगु कम यायेफइ । स्याइगु तसकं हे जुल धाःसा न्हिछिया दुने छगू निसें निगू गिलास तक गाजरया जूस त्वनेफु। गाजरया सेवनं थीमजिउ जुयाच्वंगु इलय् हीमी चाइगु मजुइकाः मूडयात थासय् लाकातयेत ग्वाहालि याइ ।

पाचनयात फाइदा :
यदि छितः पाचनलिसे स्वापू दुगु समस्या दु धयागु खःसा न्हिं निपु गाजर नयेबलय् फाइदा हे जुइ । थुकिं प्वाःयात एकदम ठीक यानाबी । यदि छितः ग्यास्टिकया समस्या दु धयागु खःसा न्हिछिया दुने हे तःक्वः गाजर छकू छकू नयाच्वनेगु यायेमाः । गाजरया रसय् वाउँधन्या, जी, मलय् कागतिया ®स व चि ल्वाकछ्यानाः त्वनाबिल धाःसा पाचनलिसे स्वापू दुगु गडबडी मजुइकेफइ ।

म्हासु ल्वचय् फाइदा :
म्हासु ल्वय् (जन्डिस) जुयाच्वंम्हेसित गाजरया सेवनं फाइदा हे याइ । थुकियात म्हासुल्वय्या प्राकृतिक उपचार कथं नालातःगु दु। कोलेस्टेरोलया लेभल क्वकाइ : गाजर नयेगु यानाच्वन धाःसा कोलस्टेरोलया लेभल कम जुइ । बहनी जा नये धुंकाः छुं ई लिपा अथवा द्यने त्ययेकाः छगू गिलास गाजरया जूस त्वनाबिल धाःसा कोलेस्टेरोलयात नियन्त्रणय् तयेफइ ।

ब्लड प्रेसर थासय् लाकातइ :
गाजरय् पोटाशियम दइ, गुकिं ब्लड प्रेसरयात थासय् लाकातयेत ग्वाहालि याइ । कमजोरीया कारणं इक्कुल धाःसा गाजर अवश्य हे भपादिसँ ।

हि सफा याइ :
गाजरया रस त्वनेगु यात धाःसा हि सफा जुइ । थुकियात प्राकृतिक रक्तशोधक नालातःगु दु ।

कब्जियत मजुइकाबी :
गाजरय् फाइबर यक्व दइ । अथे जुयाः थ्व कचिकं नयेबलय् प्वाः सफा जुइ । अले कब्जियतया समस्या मजुयावनी । कब्जियतं यानाः झीगु म्हय् तःताजि हे ल्वय् पिकाइ धयागु विश्वास यानातःगु दु। उकिं कब्जियतं तापाक च्वनेगुली हे झीगु भलाइ दु ।

डाइबिटिजय् फाइदा :
गाजरया नियमित सेवनं हिइ ब्लड सुगरया लेभल थासय् लानाच्वनी । गाजरय् पोटाशियमप, मेग्निज व म्याग्नेशियम दइ, गुकिं सुगर लेभलयात नर्मल यानातइ, अले थुकथं डाइबिटिजया खतरायात कम यायेफइ ।

एजेन्सीया ग्वाहालिं : निरा महर्जन