यु १९ य् नेपालं एशिया कप म्हितीगु

येँ – नेपालं यु १९ या एशिया कप म्हितीगु जूगु दु । म्हिगः जूगु एसिसी इस्टर्न रिजन क्रिकेटया फाइनालय् हंगकंगयात बुकुसें नेपालं एशियाकप म्हितेगु निंतिं थाय् सुरक्षित याःगु खः । मलेसियाया क्वालालाम्पुरया किनरारा ओभल क्रिकेट मैदानय् जूगु फाइनल कासाय् नेपालं हंगकंगयात ६ विकेटं बुकूगु खः ।

थ्व विजय लिपा नेपाः श्रीलंकाय् वइगु भदौ ११ गते निसें जुइगु एशिया कपय् म्हितेखनीगु जूगु खः । थ्व धेंधेंबल्लाखय् भारत, पाकिस्तान, श्रीलंका, बंगलादेश, युएई व कुवेतलिसे नेपालं धेंधेंबल्लाः याइ । म्हिगः जूगु कासाय् टर बुइवं न्हापां ब्याटिङ्ग याःगु हंगकंगं मुक्कं ९५ रन जक दयेकेफुगु खः ।

९६ रनया लक्ष्य ज्वनाः मैदानय् कुहां वःगु नेपालं १६.१ ओभरय् प्यंगू विकेटया क्षतिइ लक्ष्य पूवंकूगु खः । नेपाःया निंतिं पवन शर्राफं ३९ रन, रित गौतमं १३ रन, कप्तान रोहितकुमार पौडेलं १२ व खडकबहादुर बोहरां ८ रन दयेकूगु खः । हंगकंगयात ९५ रनय् सीमित यायेगु झ्वलय् नेपाःया निंतिं सागर ढकालं घातक बलिङ्ग यात ।

सागरं १० ओभरय् ५ मेडन तयाः मुक्कं १८ रन बियाः न्यागू विकेट काःगु खः । हंगकंगया निंतिं आदित गोरवारा, काल्हन चल्लुल व रौनक कपुरं जक निगू अंकया रन दयेकेफत । नेपाःया निंतिं कमलसिंह ऐरीं ३, कुशल मल्ल व तिलक राजभण्डारीं छगू छगू विकेट काःगु खः ।