पिपिइ पुनाः द्यः जात्रा

येँ (नेपालभाषा टाइम्स) – म्हिगः पचली भैरवयात द्यः गमय् बिज्याकूगु दु। म्हिगः न्हिनय् भिंद्यः त्वालय् च्वंगु थकू जुजुया छेँय् पुजा कायेधुंकाः पचली आजुयात गमय् बिज्याकूगु खः । व स्वयां न्ह्यः पुंया छेँय्नं आजुयात थकू जुजुया छेँय् पुजा फयेकेत यंकूगु खः । अन पुजा फय् धुंकाः द्यःयात गमय् बिज्याकूगु खः । म्हिगः द्यः गमय् तये यंकेगु झ्वलय् द्यः क्वबिउपिं सकस्यां पिपिइ सेट पुनाः जक द्यः क्वबिउगु खःसा द्यः क्वबिइपिं फुकसिया पीसीआर टेस्ट याकूगु खः ।

पचली भैरव जात्रा व्यवस्थापन समितिया कथं थौं नं जात्राय् द्यः क्वबिइपिं सकसितं पिपिइ सेट पुनेगु व्यवस्था यानातःगु दु। उकथं आजु, अजिमा व रुद्रविनायक गनेद्यःयात नं पिपिइ सेट पुंकाः जक जात्राय् ब्वति काइगु खँ धाःगु दु। न्हापा न्हापा जूसा लिबाक जक द्यः गमय् तयेगु याना वयाच्वंगु खःसा थुगुसी कोरोना भाइरस संक्रमणया कारणं यानाः न्हिनय् हे द्यः गमय् तयेगु ज्या जूगु खः । उकथं हे थौं नं न्हिनय् हे द्यः जात्रा यायेगु कथं तयारी जुयाच्वंगु खँ व्यवस्थापन समितिया दुजः लिसें वडा दुजः पुष्प प्रजापति (नातिं) कनादीगु दु ।