क्वःबुँइचिया तःधंगु बथान वयेफुगु खतरा
येँ- नेपाःया कृषि विज्ञतय्सं आः नेपालय् दुहां वःगु क्वःबुँइचाया बथान चीधंगु जक जूगु व लिपा तःधंगु बथान वयेफुगु खतरा दुगु खँ धाःगु दु । आः वयाच्वंपिं क्वःबुँइचाया बथान चीधंगु जूगुलिं थुकिं तःधंगु क्षति मयाइगु जूसां तःधंगु बथान वल धाःसा यक्व क्षति यायेफुगु खँ उमिसं धाःगु दु ।
नेपाःया तराई पाख शनिवाः सुथय् निसें क्वःबुँइचा दुहां वःगु खः । भारतं बारा, पर्सा जिल्ला जुयाः दुहां वःगु क्वःबुँइचा बुलुहु पहाडी जिल्ला तकं थ्यंकःवंगु खः । थ्व झ्वलय् येँ, यल, काभे्रय् तकं भचा भचा क्वःबुँइचा खनेदुगु खः ।
विज्ञतय्सं अझ नं भारतय् क्वःबुँइचातयेगु च्यागू झिगू तःतःधंगु बथान च्वनाच्वुं दनि धासें थुपिं दुहां वल धाःसा नेपालय् नं तःधंगु क्षति जुइगु खँ धाःगु दु । तर थुपिं दुहां वइगु धाःसा फय् गुकथं न्ह्याःवनी धयागु खँय् भर लाइगु खँ धाःगु दु ।
प्लान्ट क्वारन्टीन व विषादी व्यवस्थापन केन्द्रया वरिष्ठ बाली संरक्षण अधिकृत रामकृष्ण सुवेदीं आः दुहां वयाच्वंपिं क्वःबुँइचातय् उमेर नं वनेधुंकूगुलिं उलि ग्यायेम्वाःगु खँ धयादीगु दु । लिसें वय्कलं धयादीगु दु, ‘यदि फय्या बहाव उत्तरपाखे जुयाः भारतय् च्वनाच्वंगु ततःधंगु बथान नेपालय् दुहां वल धाःसा समस्या जुइफु ।’ वय्कलं जनकपुर निसें पश्चिम पाखेया क्षेत्रय् सजगता नालेमाःगु खँ धयादीगु दु ।
मौसमया पूर्वानुमान कथं वइगु स्वन्हु तक फय् पूर्व उत्तर जुयाः पश्चिमपाखे न्ह्याः वनीगु खनेदु, उकिं पूर्वपाखे स्वयां पश्चिमपाखे थप सतर्कता अप्वयेकेमाःगु वय्कःया धापु दु । भारतय् च्वनाच्वंपिं क्वःबुँइचाया छगू बथानय् हे च्यागू–झिगू करोड क्वःबुँइचा दुगु खँ धाःगु दु ।
अथेहे विज्ञतय्सं क्वःबुँइचा दुहां वल धाःसा सरकारी स्तरं जक क्वःबुँइचित ख्यायेत थाकुइगु धासें जनस्तरय् हे चेतना थकायेमाःगु खँ धाःगु दु । किसानतय्सं सक्रिय जुयाः क्वःबुँइचा ख्यायेफत धाःसा उपिं बुँ मच्वसें जंगल पाखे वनीगु, व थुकिं म्हो जक क्षति जुइगु खँ कृषि विज्ञ सुवेदीं धयादीगु दु ।
LEAVE YOUR COMMENTS