ने. सं. ११४४ कौलाथ्व षष्ठी -

स्वनिगलय् नं समुदायस्तरय् संक्रमण जुइगु खतरा अप्वल

येँ (नेपालभाषा टाइम्स) – स्वनिगलय् नं समुदायस्तरय् कोरोना संक्रमण सुरु जुइगु खतरा ब्वलंगु दु। म्हिगः छन्हुं हे स्वनिगलय् गुम्ह कोरोना संक्रमितत खनेदयेवं विज्ञतय्सं चिन्ता प्वंकाहःगु खः ।

म्हिगः न्हिछिया दुने नेपाःन्यंकं यानाः ४३४ म्हेसिके कोरोना जूगु पुष्टि जूगु खः । स्वास्थ्य तथा जनसंख्या मन्त्रालयं याःगु नियमित कोरोना अपडेटया झ्वलय् बिहीवा सनिलय् तकया २४ घौ दुने ४३४ म्ह कोरोना संक्रमित खनेदुगु खँ धाःगु खः । थ्व संक्रमितत मध्ये स्वनिगलय् च्वंपिं गुम्ह लाःगु खः । थुकिया लिसें नेपालय् कोरोना संक्रमिततय् ल्याः ११ हजार १६२ म्ह थ्यंगु दु ।

स्वनिगलय् संक्रमित खनेदुम्ह मध्ये छम्ह डोल्पां वःम्ह खःसा छम्ह सुनसरीं वःम्ह खः । अथेहे गागलफेदीया छम्ह न्यादँ दुम्ह मचायाके नं कोरोना पुष्टि जूगु दु। मेपिं संक्रमितत मध्ये सुकेधाराया छम्ह मिसा व थापागाउँया छम्ह मिसा जूगु खँ धाःगु दु। अथेहे मेम्ह छम्ह नख्खुया ल्याय् म्ह खः । थुपिं न्हय्म्ह बाहेक मेपिं निम्ह गनयापिं धयागु स्पष्ट मजूनि ।

डोल्पां वःम्ह मिजं वंगु असार ७ गते जक येँय् थ्यंकः वःम्ह खःसा सुनसरीया मिजं असार २ गते माल्दिभ्सं वःम्ह खः । थुपिं निम्हेसिकें छुं नं लक्षण खनेमदुगु मन्त्रालयं धाःगु दु। सुकेधारा व थापागाउँया संक्रमितत निम्हं भारतं छम्ह कोरोना संक्रमित लिसे छगः हे गाडीं लिहां वयाः येँय् वःगु खँ धाःगु दु ।

स्वनिगः पिनें स्वनिगलय् दुहां वयाच्वंपिंके नं धमाधम कोरोना खनेदया वःगुलिं आः स्वनिगलय् नं छुं नं इलय् समुदायस्तरं कोरोना संक्रमण जुइफुगु खतरा ब्वलंगु खः । सरकारं स्वनिगलय् दुहां वयेगु निंतिं स्थानीय तहया स्वीकृति कयाः जक दुहां वयेमाः धाःगु खःसां उकिया बांलाक अनुगमन यायेमफुगुलिं न्हिं हे द्वलंद्वः मनूत छुं परीक्षण तकं मयाकुसे स्वनिगलय् दुहां वयाच्वंगु दु ।

थ्व च्यान्हु झिन्हुया दुने जक स्वनिगलय् न्यय्द्वलं मल्याक मनूत पिने जिल्लां स्वनिगलय् दुहां वयेधुंकूगु तथ्यांक दु। थप निम्हं संक्रमित मंत म्हिगः हे कोरोना संक्रमित निम्ह ल्वगिया ज्यान वंगु दु। थुकिया लिसें नेपालय् कोरोना भाइरस संक्रमणं सीपिनि ल्याः २६ म्ह थ्यंगु दु ।

सीपिं मध्ये छम्ह यलया पाटन अस्पतालय् मदुगु खःसा मेम्ह छम्ह पोखरा अस्पतालय् मदुगु खः । पाटन अस्पतालय् सीम्ह यल महालक्ष्मी नगरपालिका ५ वडायाम्ह खः । वयागु न्याला न्ह्यव जक जलास्येँ प्रत्यारोपण जूगु खःसा स्वास्थ्य समस्या वःगुलिं अस्पताल हःगु खः । अस्पतालय् कोरोना परीक्षण यानास्वःबलय् संक्रमण खनेदुगु खः । अथेहे पोखराय् सीम्ह मिजं स्याबजायाम्ह खः । चिनि ल्वय् दुम्ह वयात श्वासप्रश्वासय् समस्या खनेदुगुलिं अस्पताल भर्ना याःगु खँ धाःगु दु ।

ख्वपया क्वारन्टाइनं लिहां वंपिं प्यम्हे सिके कोरोना
विदेशं लिहां वयाः ख्वपया खरीपाटीइ क्वारेन्टाइनय् च्वनाः छेँय् लिहां वंपिंके हे कोरोना संक्रमण खनेदुगु दु। युएई वंगु जेठ २३ गते नेपाः वःपिं १५७ म्ह मध्ये क्वारेन्टाइनय् च्वना वंपिं प्यम्हेसिके कोरोना संक्रमण खनेदुगु खः । क्वारेन्टाइनय् च्वनाच्वंगु इलय् उमिगु पिसिआर परीक्षण यायेगु कि मयायेगु धयागु अलमल जुयाच्वंगु खः । थ्व हे अलमलया दथुइ १४ न्हु क्वारेन्टाइनं छेँय् लिहां वने त्ययेका जक उमिगु स्वाब काःगु खः । स्वाब कयाः परीक्षण याःगु नं लिबाःगुलिं उपिं क्वारेन्टाइनं छेँय् लिहां वंगु स्वन्हु लिपा जक संक्रमण पुष्टि जूगु खः ।