साँगाय् सतक विस्तार विरुद्ध सतक बन्द

येँ – वंगु १५ गते साँगानिसें भ्वँत तक अरनिको राजमार्ग विस्तारया झ्वलय् उगु क्षेत्रया स्थानीय जनताया छेँ टहरा बिना मुआब्जा सरकारं जबर्जस्ती थुंगु विरोधय् म्हिगः प्रदर्शन जूगु दु । सलंसः स्थानीय जनतां अन घौछि सतक पना बिउगु खःसा वयां लिपा सांगा व भ्वँतया बस्ती चाःहिलाः हाकनं सतकय् तुं वयाः यातायात बन्द याःगु खः ।

प्रदर्शनया झ्वलय् गैरन्यायिक सडक विस्तार बन्द या, अदालतया आदेशयात सम्मान या, अदालतया निर्णय कथं क्षतिपूर्तिया व्यवस्था या, जनताया छेँ थुने दइ मखु, विकासया नामय् विनाश याये दइ मखु, थ्व विकास मखु कमिसनया खेल खः, नेवाः भूमि लाका काये दइ मखु धइगु नारा थ्वयेकूगु खः ।

उगु प्रदर्शनय् उपत्यकाव्यापी सडक विस्तार पीडित संघर्ष समितिया अध्यक्ष लिसें आपालं कार्यकर्तां ब्वति काःगु खः ।प्रर्दशनया कारणं अन छुं ई यातायात अवरुद्ध जूगु खः । अथेहे सरकारया उगु गैरन्यायिक ज्यायात कयाः उपत्यका व्यापी सडक विस्तार पीडित संघर्ष समितिं थःपिनि ध्यानाकर्षण जूगु खँ धाःगु दु ।

समितिया अध्यक्ष सुमन साय्मि म्हिगः छगू प्रेस विज्ञप्ति पिथँसें मोहनि नखः न्ह्यःने वयाच्वंगु इलय् जूगु थुकथंया घृणित ज्यायात भत्सर्ना यानादीगु दु ।

प्रेस विज्ञप्तिइ सर्वोच्च अदा–लतया पूर्ण पाठया स्पष्ट निर्देशन व संविधानया धारा २५ व ३७ कथं मौलिक हक व अन्तर्राष्ट्रिय अनुबन्ध उल्लंघन जुइ कथं पटक पटक सरकारं यानाच्वंगु थज्याःगु गैरन्यायिक ज्यां कानुनी राज, संविधानवाद व सुशासनया अपमान जूगु खँ नं धयातःगु दु । विज्ञप्तिइ थज्याःगु ज्या दिकाः अदालत व संविधानया सम्मान यायेत नं माग यानातःगु दु ।