ने. सं. ११४४ ञलागा पारू -

ख्वनाय् तःजिक नेवाः प्रदर्शन

मानव अधिकार आयोगपाखें समस्याया अध्ययन याइगु

यल – नेपाली सेनां दयेकाच्वंगु फास्ट ट्राय्कपाखें विस्थापित जुइपिं ख्वनाया स्थानीय जनतां आः थुकिया विरुद्ध जनतायात थनेगु लागिं छेँय् छेँय् हे वनाः जागरण ब्वलंकेगु अभियान न्ह्याकेत्यंगु दु । फास्ट ट्राय्कपाखें जनतायात विस्थापित याये दइ मखु धासें म्हिगः ख्वनाया च्वय्लाछिइ छगू तःधंगु सभा याःगु खः । नेपाल सांस्कृतिक पुन–जार्गरण अभियान, खोकना जनसरोकार समिति व शेभ नेपाः भ्यालीया मंकाः ग्वसालय् उगु सभा जूगु खः । ज्याझ्वलय् ख्वनाया वस्ती दुने हे दयेकः वइगु फास्ट ट्राय्क, बाह्य चक्रपथ, बागमती कोरिडर, हाइटेन्सन तार आदि थेंज्याःगु कथित विकासया ज्यां ख्वनाय् विकाश हयेत्यंगु खँय् चिउताः प्वंकेगु ज्या जूगु खः । ज्याझ्वलय् वरिष्ठ अधिवक्ता शंकर लिम्बु, सडक विस्तार संघर्ष समितिया सुमन साय्मि, शान्तप्रकाश श्रेष्ठ, रुक्साना कपाली, नेपाल महर्जन, असोजकुमार महर्जन आदिपिंसं समस्या बारे खँ तयादीगु खः ।

ज्याझ्वलय् नेवाः सरोकारया थीथी पुचःया प्रतिनिधिपिं नं दीगु खः ।थ्वहे पुचलं म्हीग राष्ट्रिय मानव अधिकार आयोगया प्रमुख आयुक्त अनुपराज शर्मायात नं नापलानाः थःपिनि समस्या अवगत याकूगु खः । उगु इलय् प्रमुख आयुक्त शर्मां सेनाया जर्नेल, सीडीओ आदिपिंत अन हे फोन यानाः समस्याया बारे जानकारी कयादीगु खः । आः थःपिं हे ख्वनाया निरीक्षणय् वयाः पीडितपिं नापलायेगु खँ नं प्रमुख आयुक्तं कनादिल । म्हिगःया सभा लिपा आः स्थानीय जनतां ख्वनाया हरेक छेँखाय् वनाः थःपिंत वयाच्वंगु संकट बारे अवगत याकेगु व छगू हे सः यानाः राज्ययात दबाब बीगु खँ असोजकुमार महर्जन ‘नेपालभाषा टाइम्स’ यात कनादिल ।