दक्षिणकालीया लँ मदयेकूगुलिं आन्दोलन

येँ – दक्षिणकाली–चोभाः सतक पीच यायेगु ज्या इलय् क्वमचायेकू धासें स्थानीय वासिन्दां म्हिगः सुथय् चोभाः लागाय् यातायात ठप्प यानाबिउगु दु । खुदँ न्ह्यवंनिसें सतक दयेकेगु ज्या न्ह्याकूगु खःसां ठेकदारं इलय् ज्या क्वमचायेकूगुलिं स्थानीय जनतां विरोध याःगु खः ।

सतक दयेकेगु निंतिं प्यक्वः तक म्याद थप यायेधुंकूसां सतकया अवस्था गथे खः अथे हे जुयाच्वंगु धासें ज्या याकनं क्वचायेकेमाःगु माग यासें स्थानीय जनतां आन्दोलन याःगु खः । स्थानीय वासिन्दां यातायात अवरुद्ध यानाः आन्दोलनय् कुहां वयेवं प्रहरी प्रशासन, ठेकेदार कम्पनी व स्थानीय वासिन्दाया दथुइ म्हिगः सहलह जूगु दु ।

सहलह लिपा वइगु झिंन्यान्हुया दुने सतक पीच क्वचायेकेगु सहमति जुइवं आन्दोलन स्थगित याःगु दु । सतक पीच याये न्ह्यः तत्काल उगु सतक खण्डय् दुगु गाः ल्हाकेगु व वा वयेगु दीवं पीच यायेगु सहमति जूगु खँ चोभार संरक्षण समितिया अध्यक्ष पञ्चलाल महर्जनं ‘नेपालभाषा टाइम्स’ यात कनादीगु दु ।

मेखे कलंकी–नागढुंगा सतक खण्ड विस्तारया म्याद प्यक्वःगुखुसी थप जुइगु जूगु दु । स्वक्वः तक म्याद थप यानाः नं ज्या क्वमचाःगुलिं प्यक्वःखुसी याद थप यायेगु तयारी जुयाच्वंगु दु । सतक विस्तारया जिम्मा काःगु ठेकेदार कम्पनी शैलुङ कन्स्ट्रक्सनं वइगु जेठ तक म्याद थप यायेगु निंतिं काठमाडौं सतक विस्तार आयोजनाय् प्रस्ताव याःगु खः ।

तर आयोजनां धाःसा ताः ई थप याये मफइगु खँ धाःगु दु । सतक विस्तार यायेगु ई २०७४ असारय् फुइधुंकूगु खः । तर ज्या क्वमचायेवं सरकारं खुलाया ई थप याःगु खःसा २०७४ वैशाख तक नं ज्या क्वमचायेवं सरकारं निक्वःखुसी दछिया म्याद थप याःगु खः । हाकनं वंगु वैशाखं नं ज्या क्वमचायेवं असार तकया म्याद थप याःगु खः ।