अनसनया ३० लाख खर्च नं बीत माग

येँ – जनयुद्ध ल्वानाबलय् घाःपाः जूपिं पूर्व लडाकू–तय्सं येँय् अनसन च्वनाबलय् व थ्व दौरानय् वासः यानाबलय् जूगु खर्च सरकारं पुलेमाःगु माग याःगु दु । उमिसं म्हीग सरकारलिसे छगू सम्झौता यासें अनसन त्वाःथःगु खः । थ्व अनसन च्वनाबलय् टेण्ट, पाल, पत्रपत्रिका आदि समेत यानाः कुल ३० लाख दां खर्च जूगु दु धासें थ्व दां सरकारं पुला बीमाःगु माग याःगु खः ।

सरकारं उमिगु माग पूवंकेगु बचं बिउगु दु । तर अनसन अवधि दुने जूगु ३० लाखया खर्च बारे धाःसा छुं धाःगु मदुनि । अनसनकारीतय्सं थःपिं अनसन च्वनेत येँय् वयाबलय् जूगु वासः खर्च समेत सरकारं पुलेमाःगु माग याःगु खः । थःपिं जनयुद्ध ल्वानाबलय् घाःपाः जूगु खःसां जनयुद्ध लिपा माओवादी पार्टी व उकिया नेतातय्सं थःपिंत वास्ता मयाः धासें घाःपाः जूपिं सकसितं माओवादी पार्टी वा सरकारं निःशुल्क वासः याकेमाः धइगु माग यासें थीथी जिल्लायापिं खुम्ह घाइतेत येँय् अनसन च्वंगु खः ।

अनसनकारीतय्सं दावी याः कथं माओवादी जनयुद्धय् लडाकू जुयाः ल्वाःपिं ६,००० म्ह लडाकूत थौंकन्हय् घाइते अवस्थाय् लानाच्वंगु दु । उकी मधेस आन्दोलन लगायत वयां लिपा नं जूगु थीथी आन्दोलनय् लगे जूबलय् घाःपाः जूपिं समेत तयेगु खःसा घाइतेया ज्याः १६,००० म्ह दइगु खँ उमिसं धाःगु दु ।

जनयुद्धय् घाइते जुयाः अपांग जूपिं आपालं मनूत थौंकन्हय् मेगु ज्या तकं याये मफयाः अलपत्र अवस्थाय् लानाच्वंगु खँ उमिसं धाःगु दु । उमित सरकारं मेगु मखुसां कमसेकम निःशुल्क वासः याना बीमाःगु व थुकिया पहल जनयुद्धया तत्कालीन कमाण्डर पुष्पकमल दाहाल प्रचण्डं याये माःगु उमिगु माग दु ।

सम्बन्धित बुखँ

LEAVE YOUR COMMENTS