छवाः तक स्वनिगःया फोहोर वाये मखनीगु
येँ (नेपालभाषा टाइम्स)÷ स्वनिगलय् आः हानं मेगु छवाः तक फोहोरया व्यवस्थापन यायेत समस्या जुइगु जूगु दु । फोहोर वायेगु थाय् नुवाकोटया सिसडोलंनिसें दीर्घकालीन रुपं फोहोर व्यवस्थापन यायेगु कथं दयेकूगु बञ्चरेडाँडा तक वनेगु निगू किलोमिटर ताःहाकःगु लँ दयेकेमाःगुलिं वइगु छवाः तक फोहोर व्यवस्थापन याये मफइगु खँ धाःगु दु ।
सहरी विकास मन्त्रालयं फोहोरया गाडी वयेवने याइबलय् लँ दयेकेगु ज्याय् समस्या वःगु धासें येँ महानगरपालिकायात छुं न्हि फोहोरया गाडी छ्वया महयेत याःगु इनाप कथं आःया नितिं फोहोर व्यवस्थापनया ज्या दिकेत्यंगु खः । थुकिं यानाः आः थनिंनिसें स्वनिगःया झिंच्यागू स्थानीय तहया फोहोर व्यवस्थापनया ज्या दीगु खँ धाःगु दु ।
थ्व स्वयां न्ह्यः लँ दयेकाच्वंगु इलय् नं सुथय् ४ बजेनिसें न्हिनय् १२ बजे तक जक फोहोर व्यवस्थापन यायेगु नितिं गाडी वनेगु यानाच्वंगु खः । येँ महानगरपालिकां म्हिगः छगू सुचं जारी यासें छवाः तक थःगु छेँ, पसः व्यवसायं उत्पादन जुइगु ध्वगीगु व ध्वमगीगु फोहोर सतक, दुवाः वा सार्वजनिक स्थलय् वांमछ्वसे थःगु छेँ दुने हे बिस्कं बिस्कं यानाः तया तयेत इनाप याःगु दु ।
स्वनिगलं न्हिं १२०० मेट्रिक टन फोहोर सिसडोलय् वांछ्वयाः व्यवस्थापन यायेगु ज्या जुयाच्वंगु दु । थुकी मध्ये नं दकलय् अप्वः येँ महानगरपालिका दुनें न्हिं ५०० मेट्रिक टन फोहोर उत्पादन जुयाच्वंगु दु । निजी व येँमनपाया निसः गः गाडीं फोहोर यंकेगु यानाच्वंगु खःसा थौंकन्हय् धाःसा न्यय्गः गाडी जक सिसडोल थ्यनाच्वंगु दु । स्वनिगलय् उत्पादन जुइगु फोहोर मध्ये ७५ प्रतिशत फोहोर सिसडोलय् व्यवस्थापन याना वयाच्वंगु दु ।
LEAVE YOUR COMMENTS