पीसीआर परीक्षण यायेत नीगू निजी प्रयोगशाला इच्छुक

रासस – कोरोना भाइरस (कोभिड-१९)या पीसीआर विधिपाखें परीक्षणया निंतिं निजी क्षेत्रया नीगू प्रयोगशाला व अस्पतालं इच्छा क्यंगु दु ।

राष्ट्रिय जनस्वास्थ्य प्रयोगशालाया निर्देशक डा. रुना झाया कथं गुंगू प्रयोगशालां आः हे थःपिंनाप पीसीआर मेसिन दुगु धकाः आशयपत्र बिउगु खँ धयादीगु दु । उकी मध्ये स्वंगू प्रयोगशालां थःपिं नाप परीक्षणया निंतिं आवश्यक किट तकं दुगुलिं आः हे परीक्षण यायेफइगु धाःगु दुसा मेगू खुगु प्रयोगशालां परीक्षण यायेदइगु खःसा थःपिंसं किट न्यायेगु प्रस्ताव न्ह्यब्वःगु खः ।

मेगू झिंछगूलिं आः हे मेसिन मदुगु तर अनुमति दुसा लच्छिया दुने मेसिन हयेगु खँ धाःगु दु । उमिसं लच्छिया दुने पीसीआर मेसिन न्यायेगु व निलाया दुने परीक्षण शुरु यायेगु प्रस्ताव पेश याःगु खः ।

राष्ट्रिय जनस्वास्थ्य प्रयोगशालां वंगु जेठ २२ गते छगू सूचं पिथना न्हय्न्हुया दुने कोभिड-१९ परीक्षणया निंतिं इच्छुक दर्तावाला प्रयोगशालायात थःपिं नाप दुगु क्षमता खुले यानाः प्रस्ताव न्ह्यब्वयेत आह्वान याःगु खः । बिहीवाः जेठ २९ गतेदुने प्रस्ताव आह्वान कथं निजी प्रयोगशालां प्रस्ताव पेश याःगु खः ।

‘झीसं प्रस्ताव यानाः कथंया प्रयोगशालां कोभिड-१९ परीक्षणया निंतिं इच्छा प्वंकूगु खः।’ निर्देशक डा. झां धयादिल, ‘झीसं प्रस्ताव स्वयाः उगु प्रयोगशालायात याकनं हे परीक्षणया अनुमति बीगु जुइ ।’

प्रस्ताव पेश याःगु प्रयोगशालायात अनुमति बीधुंकाः कोभिड-१९या परीक्षण यायेत चाहे जूपिं सर्वसाधारणं थःपिंसं हे शुल्क पुला परीक्षण याकेफइ । आः  सरकार मातहतया प्रयोगशालां जक निःशुल्क परीक्षण यानाच्वंगु खः । कोभिड-१९या परीक्षणया दायरा अप्वयेकेत मन्त्रालयं निजीयात तकं कोभिड-१९या पीसीआर विधिपाखें परीक्षण यायेबीगु निर्णय याःगु खः ।

प्रयोगशालायात स्वास्थ्य तथा जनसंख्या मन्त्रालयया स्वास्थ्य आपत्कालीन ज्या सञ्चालन केन्द्रं थ्वहे जेठ २० गते कोभिड-१९या परीक्षणया क्षमता अप्वयेकेत निजी क्षेत्रनापया सहकार्ययात न्ह्यःने यंकेगु सन्दर्भय् थप सहलह यानाः यथाशीघ्र मोलाडिटी तयार यायेत निर्देशन बिउगु खः । आः देय्न्यंक नीछगू प्रयोगशालापाखें पीसीआर  प्रविधिपाखें परीक्षण जुयाच्वंगु दु ।

प्रयोगशालाया निर्देशक डा. झां मन्त्रालयं मापदण्ड दयेकेधुंकाः निजी प्रयोगशालायात परीक्षण यायेगु अनुमति बीगु धयादिल । आः तक  नेपालय् छगू लख १५ हजार ९३७ पीसीआर परीक्षण जूगु दु । देय्न्यंकया नीछगू प्रयोगशालाय् बिहीवाः ५ हजार १९३ नमुनाया पीसीआर परीक्षण याःगु खः ।

स्वनिगः दुने जनस्वास्थ्य प्रयोगशाला सहित शुक्रराज ट्रपिकल तथा सरुवा रोग अस्पताल, वीर अस्पताल, त्रिवि शिक्षण अस्पताल, पाटन स्वास्थ्य विज्ञान प्रतिष्ठानपाखें परीक्षण जुयाच्वंगु दु ।

मन्त्रालयया सहप्रवक्ता डा‍. समीरकुमार अधिकारीं पीसीआर परीक्षणया निंतिं निजीयात नं बीगु सैद्धान्तिक निर्णय याःसां छु गुकथं गुलि शुल्क पुला यायेगु धइगु बारे मापदण्ड दयेकाच्वंगु धयादिल ।

सम्बन्धित बुखँ

LEAVE YOUR COMMENTS