जनता समाजवादी पार्टी निर्वाचन आयोगय् दर्ता

येँ – जनता समाजवादी पार्टी (जसपा) निर्वाचन आयोगय् दर्ता जूगु दु । समाजवादी पार्टी नेपाल व राष्ट्रिय जनता पार्टी (राजपा) नेपाल दथुइ एकीकरण जुया नीस्वंगु जनता समाजवादी पार्टी आइतवाः निर्वाचन आयोगय् दर्ता जूगु खः । आइतवाः न्हिनय् जसपाया नेतात कान्तिपथय् च्वंगु निर्वाचन आयोगय् वना पार्टी दर्ता याकूगु खः । न्हूगु पार्टीया दर्ता नम्बर १३९२ खः ।

थ्वस्वयां न्ह्यः च्वंगु पार्टीया मुँज्यां पार्टीया पदाधिकारीतय् जिम्मेवारी क्वःछिउगु खः । न्हूगु पार्टीया संघीय परिषदया अध्यक्षय् डा. बाबुराम भट्टराई, केन्द्रीय परिषदया अध्यक्षय् महन्त ठाकुर व उपेन्द्र यादव जुइगु सहमति जूगु खः । वरियता कथं डा. बाबुराम भट्टराई दकलय् च्वय्, अले महन्त ठाकुर व स्वंगूगु थासय् उपेन्द्र यादव खः । अथेहे प्यंगूगु व न्यागू थासय् अशोक राई व राजेन्द्र महत्तो जुइगु सहमति जूगु खः ।

समाजवादी व राजपा दथुइ वंगु वैशाष १० गते पार्टी एकीकरण जूगु खः ।