नेवाः देय् दबू स्वनिगः प्रदेशया न्हापांगु अधिवेशन

येँ- नेवाः देय् दबू स्वनिगः विशेष प्रदेशया न्हापांगु अधिवेशन वंगु बुधवाः येँया उत्तरी भेगय् लाःगु सांस्कृतिक नगरी तोखाय् जुल । स्वनिगः विशेष प्रदेशया न्हापांगु अधिवेशनया उलेज्या देय् दबूया केन्द्रीय नायः नरेशकुमार ताम्राकारं यानादीगु खः ।

उलेज्या न्ह्यः तोखाया ऐतिहासिक पुखुलिइ मुनाः सांस्कृतिक ¥यालीं तोखा नगर चाःहिउगु खः । बागमति प्रदेशया नायः उमेश स्थापितया सभापतित्वय् जूगु उलेज्याझ्वलय् विशेष पाहांकथं तोखा नगरपालिकाया प्रमुख प्रकाश अधिकारी, उपप्रमुख ज्ञानीमैयाँ डंगोल, नेवाः देय् दबूया पुलांम्ह मूछ्याञ्जे पवित्र वज्राचार्य, सल्लाहकारलिसें पुलांम्ह राज्यमन्त्री तीर्थराम डंगोल झायादीगु खः।

अथे हे पाहांकथं नेपाल संवत् न्हूदँ राष्ट्रिय समारोह समिति ११४२या नायः निरञ्जनरत्न शाक्य, लोककवि राजभाई जकःमि, देय् दबू येँ जिल्ला नायः धनबहादुर तिमिला, २ वडाअध्यक्ष दीपकराज जोशी व ३ वडाअध्यक्ष सिंहराज श्रेष्ठ, देय् दबूया छ्याञ्जे सत्यनारायण डंगोल, दुजःपिं न्हुछेकाजी महर्जन, बदन शर्मा राजोपाध्याय झायादीगु खः ।

नेवाः गुथि तोखाया नायः रमेश नापितं लसकुस यानादीगु ज्याझ्वलय् देय् दबू तोखा नगर कमिटीया नायः हिराकाजी डंगोलं तोखाया म्हसीका व गतिविधिया जानकारी बियादीगु खः ।

लोककवि जकःमिं चिनाखँ न्यंकादीगु ज्याझ्वलय् सल्लाहकार डंगोलं भिंतुना न्वचु तयादीगु खःसा प्रदेशया छ्याञ्जे श्रीकृष्ण महर्जनं सार संक्षेपं प्रगति प्रतिवेदन न्ह्यब्वयादीगु खः । न्हापांगु सत्रय् अधिवेशन ताःलाकेत थीथी कथं ग्वाहालि यानादीपिंत सुभाय् पौ नं लःल्हाःगु खः ।

अथे हे निगूगु सत्रय् छ्याञ्जेया प्रतिवेदनयात कयाः येँ महानगर समितिया नायः शोभा महर्जन वज्राचार्य, यल महानगर कमिटी नायः बुद्धरत्न शाक्य, येँ जिल्ला नायः धनबहादुर तिमिला, यल जिल्ला नायः हिराकाजी महर्जन, ख्वप जिल्लाया नायः नरेश नेवाः व उदेन न्हूसाय्मिं थःथःगु धारणा तयादीगु खः ।

बन्द सत्र लिपा जूगु ल्यज्यां स्वनिगः विशेष प्रदेशया न्हूगु ज्यासना पुचः नं ल्यःगु खः । श्रीकृष्ण महर्जनया अध्यक्षताय् स्वीस्वम्हेसिया न्हूगु ज्यासना पुचः ल्यःगु खः । ज्यासना पुचलय् वरिष्ठ न्वकु नविन थेच्वमि, सुमन श्रेष्ठ व डा. अमिता प्रधान शाक्य (मिसा न्वकु), मूछ्याञ्जे गणेशमान श्रेष्ठ, मिसा छ्याञ्जे गंगादेवी महर्जन व दांभरिंलय् जीवनदेवी वज्राचार्ययात ल्यःगु दु ।

थुकथं हे दुजलय् भेषराज श्रेष्ठ, ज्ञानेन्द्र महर्जन, राजेशराम श्रेष्ठ, देवराज डंगोल, रमेश नापित, पद्मलक्ष्मी ताम्राकार, हेराकाजी महर्जन, शैलेश शाक्य, सुशिला मानन्धर, हेराशोभा डंगोल, सूर्यनारायण श्रेष्ठ, उमेश मुनिकार, नीलम वज्राचार्य, केशव महर्जन, अजय पुतुवार, समिनराज शाक्य, विष्णुदेवी महर्जन, राजाराम तण्डुकार, नरेश श्रेष्ठ, पार्वती मानन्धर, नीलकण्ठ महर्जन, श्रीकृष्ण डंगोल, रोशनी प्याथ, कविता प्रधानयात ल्यःगु दु ।

अथेह अधिवेशनं वइगु चैत १४ व १५ गते निन्हुयंकं धरानय् जुइगु न्हय्क्वःगु तःमुँज्याया निंतिं राष्ट्रिय परिषदय् येँ जिल्लां उदेन न्हूसाय्मि व यल जिल्लां शरणगोपाल डंगोलयात ल्यःगु दुसा ३३ प्रतिशत मिसालिसें २० म्ह प्रतिनिधि नं ल्यःगु दु ।

सम्बन्धित बुखँ

LEAVE YOUR COMMENTS