शतक रक्तदाता प्रेमसागरपाखें १६२क्वःगु खुसी हिदान

येँ – स्वयंसेवी शतक रक्तदाता प्रेमसागर कर्माचार्यं १६२क्वःगु खुसी हिदान यानादीगु दु । येँया वडा नम्बर २८या ड्रिमल्याण्ड पक्लिक हाई स्कूलं ग्वसाःग्वःगु ज्याझ्वलय् रक्तदाता कर्चाचार्यं १६२क्वःगु खुसी हिदान यानादीगु खः। शतक रक्तदाता कर्माचार्यं हिदान यानाः सुरु जूगु ज्याझ्वलय् वय्कःयात वडा नम्बर २८या अध्यक्ष भाइराम खड्गीं दसिपौ बियाः अभिनन्दन नं यानादीगु खः ।

स्कूलया प्रधानाध्यापक सूर्य राईया सभापतित्वय् जूगु ज्याझ्वलय् ५०म्ह रक्तादातातय्सं हिदान याःगु खः । हिदान ज्याझ्वलय् कोभिड-१९या बारे जनचेतना थनीगु निंतिं व्यवहारिक रुपय् प्रत्येक सहभागीया ज्वरो नापे यायेगु, स्यानिटाइजर तया जक ब्वति कायेदइगु व्यवस्था याःगु खः ।हिदान याःपिंत पञ्जा, स्यानिटाइजर, मास्क लगायत कोभिड-१९या इलय् माःगु सामन नं लःल्हाःगु खः ।