
येँ – जोन्टा क्लब अफ काठमाडौं नांया संस्थां नेपाःया थीथी ख्यलय् योगदान बिउपिं मिसातय्त छगू ज्याझ्वःया दथुइ सम्मान याःगु दु । जोन्टा अन्तर्राष्ट्रिय दिवस व अन्तर्राष्ट्रिय मिसा दिवसया लसताय् लाकाः थीथी ख्यलय् प्रेरणादायी व साहसी मिसातय्त इमिगु योगदानयात कयाः सम्मान याःगु खः ।
संस्थां पदमशना शाक्ययात छगू लाख तका दांलिसें ‘द प्रिन्सेस हेलेन शाह इन्स्पिरेस्नल उमन अफ द इयर अवार्ड–२०१९’पाखें सम्मान याःगु खःसा मय्जु वसन्ती प्रधानयात नं छगू लाख तका दांलिसें ‘अमर राना उमन इन फ्लोरिकल्चर अवार्ड –२०१९’पाखें सम्मान याःगु खः ।
अथे हे श्रेया पोखरेलयात ‘ज्योति स्कलरशिप अवार्ड–२०१९ फर म. क्लावस्म्यान उमन इन बिज्नेश स्कोलरशिप’ व प्रतिक्षा गुरुङयात ‘ज्योति स्कलरसिप अवार्ड २०१९ फर योङ्ग उमन इन पब्लिक अफियरस्’या सम्मानलिसें नीन्याद्वः तका दां लःल्हाःगु खः ।थुकथं हे संस्थां थुगुसी आतक अपरिचित क्षेत्रय् योगदान बिया वयाच्वंपिं प्यम्ह मिसातय्त नं सम्मान याःगु खः ।
इपिं मिसातय्सं याःगु ज्या, लगनशीलता व उपलब्धिपाखें मेपिं मिसातय्त प्रभावित यायेगु नापं प्रोत्साहित यानाः उत्पे्ररित याःगु धासें सम्मान यानागु संस्थां जानकारी बिउगु दु ।
थुकथं सम्मानित दुयादीपिं वंगु निगू दशक न्ह्यवंनिसें हेभी इक्वीप्मेन्ट (डोजर) चले याना वयाच्वंम्ह मुना घिमिरे, नेपाःया हे न्हापांम्ह मिसा शारीरिक सुगठक निर्मला महर्जन, मिसा मेसनया रुपय् निरन्तर रुपं क्रियाशील जुयाच्वनादीम्ह राममाया तामांग व न्हापांम्ह मोटरसाइकल रेसर नापं स्टन्ट राइडर दिक्षा श्रेष्ठयात म्हतिं नीन्याद्वः तका दांलिसें सम्मान याःगु खः ।
संस्थां मिसातय्गु आर्थिक अवस्थालिसें शिक्षा, स्वास्थ्य लगायतया क्षेत्रय् सुधारलिसें मिसा सशक्तिकरणया निंतिं ज्या यानावयाच्वंगु दु । लिसें स्थानीय व राष्ट्रियस्तरय् मिसा हिंसा व मिसातय्त जुइगु भेदभाव सम्बन्धी विषयय् नं जागरण अभियान न्ह्याका वयाच्वंगु दु ।
संस्थां अपवाद व प्रभावकारीरुपं ज्या यानाः समाजय् हिउपाः हयेगु नापं मेपिंत नं प्रोत्साहित यायेगु ल्याखं निरन्तर रुपं थीथी क्षेत्रय् ज्या याना वयाच्वंपिं मिसातय्त सम्मान यायेगु याना वयाच्वंगु दु । ज्याझ्वःया निंतिं संस्थायात नबिल बैंकं ग्वाहालि याःगु खः ।
LEAVE YOUR COMMENTS