महालेखा प्रतिवेदनय् सरकारया बेवास्ता
बिबिसी – जानकारतय्सं धायेगु याः, ‘महालेखापरीक्षकया कार्यालयया प्रतिवेदनयात न त सरकारं गम्भीरतापूर्वक काइ, न त संसदया समितिं हे छलफल यानाः निर्देशन बी ।’आर्थिक क्षेत्रय् खनेदुगु विकृति व नियम पालन मजूगु विषयय् महालेखापरीक्षकया प्रतिवेदनपाखें दँय्दसं सरकारयात सुधारया पलाः न्ह्याकेत सुझाव बीगु यानाच्वंसां उकियात सरकारं गम्भीरतापूर्वक मकाःगु पुलांपिं महालेखापरीक्षकतय्सं धायेगु यानाच्वंगु दु ।
थ्व हे कारणं प्रतिवेदनय् सुधारया संकेत खनेमदुगु व आर्थिक अनियमितता व भ्रष्टाचार म्हो मजूगु धापू वय्कःपिनि दु ।संसदया सार्वजनिक लेखा समितिं तकं ताःई न्ह्यवनिसें प्रतिवेदनयात कयाः सहलह मयाःगुलिं सरकारयात निर्देशन बीगुव उकिया प्रगती समिक्षा जुइ फयाच्वंगु मदु । महालेखा परीक्षकया ज्याकुथिं दँय्दसं प्रतिवेदन पिथनाः सरकारयात आर्थिक क्षेत्रय् ल्ह्वनेमाःगु सुधारया पलाः बारे सुझाव बिया वयाच्वंगु दु ।
आर्थिक दँ २०७४÷७५ या प्रतिवेदनय् नं संघ, प्रदेश लिसें स्थानीय तह तक थीथी मन्त्रालय, कार्यालय व निकायं ऐन नियम स्वयां पिहां वनाः खर्च याःगु, प्रक्रिया पूमवंकूगु थेंज्याःगु यक्व विषय न्ह्यथनातःगु दु । अप्वः थें बुँदाय् सुधारया निंतिं सरकारी पहल हे आवश्यक जूगु खँ न्ह्यथनातःगु दु ।तर न्हापांनिसें सरकारं थज्याःगु सुझावयात गम्भीरतापूर्वक कया मच्वंगु व सुधारया पलाः मल्ह्वंगु अनुभव पूर्व महालेखापरीक्षक भानुप्रसाद आचार्यया दु ।
‘सरकारं गम्भीरतापूर्वक काःगु खःसा लिपाया प्रतिवेदनय् सुधार खनेदयेमाःगु खः । वित्तीय व्यवस्थापन क्षेत्रय् सुधार जुयावंगु खनेदयेमाःगु खः व भ्रष्टाचार नं म्हो जुयावनेमाःगु खः । महालेखाया प्रतिवेदनयात बेवास्ता याःगु कारणं हे भ्रष्टाचार व अनियमितता अप्वःगु खः ।’
वय्कलं धयादीगु दु, ‘सरकारं गम्भीरतापूर्वक काःगु खःसा लिपाया प्रतिवेदनय् सुधार खनेदयेमाःगु खः । वित्तीय व्यवस्थापन क्षेत्रय् सुधार जुयावंगु खनेदयेमाःगु खः व भ्रष्टाचार नं म्हो जुयावनेमाःगु खः । महालेखाया प्रतिवेदनयात बेवास्ता याःगु कारणं हे भ्रष्टाचार व अनियमितता अप्वःगु खः ।’सरकारपाखे जक पतिं धस्वाका च्वंगु इलय् महालेखां थःगु प्रतिवेदन तयार यायेगु शैलीइ हे बिचाः यायेमाःगु तर्क पुलांम्ह कार्यवाहक महालेखापरीक्षक सुकदेव भट्टराईं तयादी ।
वय्कं धयादी, ‘विषयगत रुपं बीफत धाःसा सरकार बाध्य हे जुइ । मेखे संसदय् महालेखाया प्रतिवेदनं महत्व काये फयाच्वंगु मदु ।’राष्ट्रपतिया ज्याकुथिइ बुझे याइगु प्रतिवेदन कार्यान्वयनया लागि धकाः सरकार व सरकारपाखें संसदय् पेश जुइ । संसदं सहलहया निंतिं धकाः सार्वजनिक लेखा समितिइ छ्वइ व उकी सहलह यानाः सरकारयात निर्देशन बीगु चलन दु ।
तर ताःई न्ह्यवनिसें संसदया सार्वजनिक लेखा समितिइ महालेखाया प्रतिवेदनय् सहलह हे मजूबलय् समस्या खनेदुगु पुलांम्ह मुख्यसचिव विमल कोइरालां धयादी । वय्कलं धयादी, ‘संसदय् ग्वदँ न्ह्यवनिसें महालेखापरीक्षकया प्रतिवेदनय् सहलह हे जूगु मदुनि । निर्देशन बिउसां पालना जूगु मदु ।
निर्देशन पालना मजूबलय् छु जुइ धयागु तकं स्पष्ट मजुल । उकिं यानाः मयाःसां जिउ निं धयागु जुल व महालेखाया प्रतिवेदन कर्मकाण्ड हने थें जक जुल ।’थ्वयां न्ह्यव नं नेपाल वायुसेवा निगमं निगः विमान न्याःगु इलय् महालेखां न्ह्यसः थँसें भुक्तानी बियाबिउगुलिं विवाद जूगु खः । गुगु विषय आः नं संसदया समिति जुयाः अख्तियारय् थ्यनाच्वंगु दु ।
LEAVE YOUR COMMENTS