नेपाःया न्हूगु नक्सा सार्वजनिक

येँ – सरकारं नेपाः न्हूगु नक्सा सार्वजनिक याःगु दु । लिम्पियाधुरा, लिपुलेक व कालापानी क्षेत्र दुथ्याका सरकारं न्हूगु नक्सा सार्वजनिक याःगु खः ।

बुधवाः न्हिनय् याःगू छगू पत्रकार सम्मलनय् भूमि व्यवस्था मन्त्री पद्मा अर्यालं नक्सा सार्वजनिक यानादीगु खः । न्हूगु नक्शा कथं नेपाःया कुल क्षेत्रफल १ लख ४७ हजार ५ सय १६ वर्ग किलोमिटर दइ ।

नक्सा सार्वजनिक यायेगु ज्याझ्वलय् मन्त्री अर्यालं नेपाःया न्हूगु राजनीतिक व प्रशासनिक नक्सा सार्वजनिक यायेगु थुगु पलाः स्मरणीय क्षण जुइगु विश्वास प्वंकादिल । वय्कलं न्हूगु नक्सा सार्वजनिक लिपा नेपालय् जक मखसें विश्व मानचित्रय् नेपाःया नक्सा हिउगु धयादिल । थ्व नापं नेपाःया मान व मन नं हिउगु धयादिसें मन्त्री अर्यालं थुकीं यानाः नेपाःमितय् मनोवल नं उच्च जूगु धयादिल ।

सोमवाः च्वंगु मन्त्रिपरिषद्या मुँज्यां भारतं अतिक्रमण याःगु भूमियात दुथ्याकाः न्हूगु नक्सा जारी यायेगु निर्णय याःगु खः ।