भक्तपुर साहित्यिक समाजया प्रतिभा पुरस्कार
ख्वप – भक्तपुर साहित्यिक समाजया नीदँ बुदिं हनेज्या व आरवी जोशी फाउण्डेशन प्रतिभा पुरस्कार इनेज्या जुल । गःपलि जूगु ज्याझ्वलय् शताब्दी पुरुष सत्यमोहन जोशीं साहित्यिक पुरस्कार नविन प्रकाश श्रेष्ठयात लःल्हानादीगु खःसा संगीत पुरस्कार गायिका सानुमैंया ताम्राकार धौभडेलयात लःल्हानादीगु खः ।
ज्याझ्वलय् वय्कलं सिरपाः धइगु दां स्वयां नं प्रेरणादायिक जुइगु महत्वपूर्ण पक्ष जूगु खँ कनादिल । ज्याझ्वःया विशेष पाहां संस्कृतिविद् तेजेश्वरबाबु ग्वंगलं प्रेरणादायी ज्या जूगु कारणं थ मांया श्राद्धपाखें दना वयाः ज्याझ्वलय् ब्वति कयाच्वनागु खँ कनादिल ।
थीथी गायक गायिकापिंसं म्ये नं न्ह्यब्वःगु उगु ज्याझ्वलय् राजुराम मुनंकर्मिं तयार यानादीगु विरहया म्येचाः नं मूपाहां सत्यमोहन जोशीं विमोचन यानादिल । विशिष्ट दुजः, जीवंकाछि दुजःतय्त दसि पौ नं इनेज्या जूगु ज्याझ्वः अध्यक्ष राजुराम मुनंकर्मिया सभापतित्वय् जूगु खः ।
LEAVE YOUR COMMENTS