न्यायपरिषद् अझं अन्यौलय्

येँ – संवैधानिक परिषद्या म्हिगः सःतूगु बैठक नं स्थगित जूगु दु । थ्व नापं यानाः बैठक स्वक्वः तक च्वने धकाः धाःसां नं स्थगित याये माःगु अवस्था वयेधुंकूगु दु । बैठक च्वने मफुगुलिं यानाः प्रधानन्यायाधीश सिफारिस यायेगु ज्या नं लिबाःगु दु ।

थ्व स्वयां न्ह्यः मंसिर १७ गते च्वनेधाःगु बैठक स्थगित जूगु खःसा २२ गते सःतूगु बैठक नं शनिवाः लाःगुलिं स्थगित यानाः म्हिगः बैठक सःतूगु खः । प्रधानन्यायाधीशयात विषयय् प्रधानमन्त्री केपी ओली शर्मा व विपक्षी दलया नेता शेरबहादुर देउवा दथुइ सहलह जुइ मफयाच्वंगुलिं बैठक स्थगित जूगु खँ सूत्रं धाःगु दु ।

प्रधानन्यायाधीश रिक्त जुइ स्वयां लछि न्ह्यः हे न्हूम्ह प्रधानन्यायाधीशया नां सिफारिस यायेमाःगु प्रावधान दु । आःया प्रधानन्यायाधीश ओमप्रकाश मिश्र उमेरया हदया कारण वइगु पुस १७ गते अवकाश कायेत्यंगु दु । परिषद्या मेगु बैठक पुस ५ गते सःतातःगु दु ।

न्हूम्ह प्रधानन्यायाधीश कथं चोलेन्द्र शमशेर जबरा व दीपक–राज जोशीया नां न्यायपरिषदं सिफारिस यानाः छ्वयेधुंकूगु दु । जोशी थ्व स्वयां न्ह्यः संसदीय सुनुवाई समितिं अस्वीकृत जुइधुंकूम्ह खः ।