अष्ट्रेलियाय् खारेज कलेजयात मुद्दाया मौका
येँ- अष्ट्रेलियाय् अनया सरकारं खारेज याना बिउगु ‘अष्ट्रेलियन इन्स्टिच्युट अफ बिजनेस टेक्नोलोजी (एआईबीटी)’ नांगु कलेजं सरकारी निर्णय विरुद्ध
मुद्दा ल्वाइगु जूगु दु । सरकारं कलेज खारेज याना बिउसां उकिया विरुद्ध मुद्दा तयेगु लागिं कलेजयात २८ न्हुया ई प्राप्त जूगु दु ।
थुकिं यानाः अन ब्वनाच्वंपिं नेपाली विद्यार्थीतय्गु अवस्था छु जुइ धइगु खँ २८ न्हु लिपा जक सी दइगु खँ धाःगु दु । यदि मुद्दाय् कलेज त्यात धाःसा विद्यार्थीतय्त छुं समस्या मवइगु व बुत धाःसा उमिगु लागिं विकल्प मालेमालीगु खँ धाःगु दु ।
आपालं नेपाःमित ब्वनाच्वंगु उगु कलेजयात खारेज याना बीवं अन ब्वनाच्वंपिं करिब १२०० म्ह नेपाःमि विद्यार्थीत विचल्लीइ लाःगु दु । थुकिं यानाः उमिगु पढाई व ध्यबा नितां सितिं वनीगु अवस्था वये फुगु खँय् चिन्ता जुयाच्वंगु दु ।
उगु कलेजय् वंगु दत्या न्ह्यवंनिसें आखः ब्वनाच्वंपिं १२०० म्ह विद्यार्थी–तय्सं आः तकया दुने म्हतिं २० निसें २५ लाख तका खर्च यायेधुंकूगु दु ।
थ्व विद्यार्थीतय् पढाई व ध्यबा सुरक्षित यायेगु लागिं अष्ट्रेलियाया थीथी संस्थातय्सं पहल शुरु यायेधुंकूगु दु । खास यानाः अन नर्सिङ ब्वनाच्वंपिं विद्यार्थीतय्गु पढाई लिसे ‘इक्वीभ्यालेन्ट’ जुइगु मेगु कलेजय् ब्वंकेगु लागिं खँल्हाबल्हा जुयाच्वंगु सीदुगु दु । उगु कलेजं नर्सिङ ब्वंकेगु लागिं अनया नर्सिङ शिक्षालिसे आवद्ध संस्थाया अनुमति तकं कया मतःगुलिं थुकिं धाःसा समस्या ब्वलंकेफुगु खँ धाःगु दु ।
थौंकन्हय् राजदूत खाली जुयाच्वंगु अष्ट्रेलियास्थित नेपाली राजदूतावासं नं थ्व विषयय् पहल शुरु याःगु दु । दूतावासं अष्ट्रेलिया सरकारया सम्बद्ध निकाययात स्वापू तयाः समस्या ज्यंकेत इनाप यानाच्वंगु दुसा अनया सरकारपाखें विद्यार्थीतय्त छुं समस्या वयेके बी मखु धइगु आश्वासन वःगु खँ धाःगु दु ।
कलेज मत्वःतेत सुझाव
कलेज खारेज जुयाः विचल्लीइ लाःपिं नेपाःमि विद्यार्थीतय्त आँटे चायाः तुरुन्त कलेज मत्वःतेत विज्ञतय्सं सुझाव बिउगु दु । सरकारं कलेज खारेज याःसां थुकिया बारे संवाद न्ह्यानाच्वंगु जुयाः सुनानं आँटे जुयाः कलेज मत्वःतेत व फ्याकल्टी नं महिलेत सुझाव बिउगु दु ।
थ्वहे झ्वलय् अष्ट्रेलियाय् स्वीकृति हे मकासे चायेकातःगु कलेजय् विद्यार्थी भर्ना याके छ्वःपिं नेपाःया कल्सन्टेन्सीतय्त कारवाही याये माःगु माग नं थ्वःगु दु । विचल्लीइ लाःपिं नेपाःमि विद्यार्थीतय् अभिभावकतय्सं येँय् अज्याःगु कन्सल्टेन्सीया ज्याकुथी वनाः हाः वनेगु समेत शुरु याना हःगु दु । सरकारं धाःसा थुकिया बारे छुं धाःगु मदुनि ।
LEAVE YOUR COMMENTS