आरडिटी पोजिटिभ खनेदुपिं येँ महानगरया सकलें सरसफाइ कर्मचारीतय् पिसिआर नेगेटिभ

येँ – येँ महानगरपालिकाया सरसफाइ कर्मचारीतय् कारोना परीक्षण झ्वलय् आरडिटीइ पोजिटिभ खनेदुपिनि पिसिआर रिपोर्ट नेगेटिभ वःगु दु । म्हिगः शुक्रवाः वातावरण विभागय् याःगु आरडिटी परीक्षणय् ३१ म्हेसिके पोजिटिभ खनेदुगु खः । पोजिटिभ खनेदुपिनि हाकनं पिसिआर विधिं यानास्वःगु परीक्षणय् नेगेटिभ वःगु खँ वातावरण विभागया प्रमुख हरिकुमार श्रेष्ठं धयादीगु दु ।

म्हिगः आरडिटीइ पोजेटिभ खनेदुपिनिगु स्वाब संकलन यानाः हाकनं पिसिआर परीक्षण याःगु खः । थौं उकिया रिपोर्ट वःगु खँ विभाग प्रमुख श्रेष्ठं धयादीगु दु । म्हिगः ३१ म्ह सरसफाइ कर्मचारीतय् आरडिटी परीक्षणय् पोजिटिभ वयेवं छगू आतंक हे न्यंगु खः । आरडिटी पोजिटिभ खनेदुपिंत वातावरण विभागय् हे क्वारेन्टाइनय् तःगु खः । पोजिटिभ खनेदुपिं कर्मचारीत थीथी वडाय् ज्याकुथिइ वनाच्वनीपिं जूगुलिं थौं वडा ज्याकुथिइ तकं आतंक न्यनाच्वंगु खः ।

सरसफाइ कर्मचारीतय्के व कालिमाति तरकारी बजारय् च्वंपिं प्यम्हेसिया आरडिटी पोजिटिभ खनेदयेवं येँय् दुनेया लागाया थीथी थासय् स्थानीयत हे जानाः सिल यायेगु ज्या नं जूगु खः ।