जग्गा कित्ताकाटय् छानविन प्रतिबन्धया इलय् ध्यबा नयाः जग्गा कित्ताकाट याःपिं हाकिमतय् दथुइ भुखाय्

येँ – भूमि व्यवस्था, सहकारी तथा गरिबी निवारण मन्त्रालयं जग्गाया कित्ताकाटय् प्रतिबन्ध तयातःसां दुनें दुने जुयाच्वंगु जग्गा कित्ताकाटयात कयाः छानविन ज्या न्ह्याकेवं मालपोत कार्यालयया हाकिमतय् दथुइ भुखाय् ब्वःगु दु । डिल्लीबजारया मालपोत कार्यालयया छम्ह लेखनदासया कथं थौंकन्हय् अनया आपालं धयाथें क्वय्या तहया कर्मचारी हिले धुंकूगु दुसा च्वय्या तहया नं प्यम्ह न्याम्ह कर्मचारी जक पुलांपिं ल्यनाच्वंगु दु ।

ल्यनाच्वंपिं कर्मचारीया नं ख्वाः धाःसा चमकंगु खँ उम्ह लेखनदासं ‘नेपालभाषा टाइम्स’ यात कनादीगु दु । वय्कलं बियादीगु जानकारी कथं दुनें दुनें अप्वः ध्यबा कयाः जग्गा कित्ताकाट यानाबिउपिं हाकिमत आः समस्याय् लानाच्वंंगु दु । अज्याःपिं हाकिमत थौंकन्हय् मालपोत सम्बन्धी छुं नं कथंया ज्या यायेत थाकु चायेकाच्वंगु दु ।

छानविन पुचलं सरकारं कित्ताकाट यायेगु ज्या बन्द यानातःगु ई दुने स्वनिगलय् जक १३०० गू स्वयां अप्वः जग्गा कित्ताकाट जुइधुंकूगु लुइकूगु खः । कित्ताकाट बन्द जुयाच्वंगु इलय् नं दुनें दुनें थथे कित्ताकाट यायेगु ज्या न्ह्यानाच्वंगुलिं मन्त्रालयं छानविन पुचः नीस्वंगु खः ।
कित्ताकाट बन्द जुयाच्वंगु इलय् मालपोतया कर्मचारीतय्सं छकू जग्गा कित्ताकाट यायेत हे निगू निसें प्यंगू लाख तका तका कायेगु यानाच्वंगु खः ।

सरकारं कित्ताकाट यायेगु ज्या बन्द यायेवं थुकिं प्लटिङ याइपिंत स्वयां नं सर्वसाधारण जग्गाधनीतय्त समस्या जुयाच्वंगु खः । थःगु जग्गा मियाः छेँया थीथी ज्या लिसें विदेशय् मस्त ब्वंकेत छ्वयेमाःपिं व जग्गा मियाः वासः यायेमाःपिं सर्वसाधारण अप्वः पीडित जुयाच्वंगु खः । थ्व खँयात ध्यानय् तयाः मन्त्रालयं कित्ताकाट यायेगु ज्याय् तयातःगु प्रतिबन्ध चीकेगु तयारी धाःसा यानाच्वंगु दु ।

राष्ट्र बैंकय् ध्यबा तयेथाय् मंत

येँ – बैंकतय्सं तये हइगु ध्यबा तयेथाय् मदयाः नेपाल राष्ट्र बैंकं उमित तुं ध्यबा लित बियाछ्वया च्वंगु दु । राष्ट्र बैंकया भण्डारण यायेगु थाय् थापाथलीइ च्वंगु भवन २०७२ सालय् ब्वःगु तःभुखाचं दुना वःगुलिं ध्यबा तयेगु थाय् अभाव जुयाच्वंगु खः । उकिं मेमेगु बैंकया ध्यबा थःपिंथाय् तयेगु थाय् मदयाः लित छ्वये मालाच्वंगु खँ राष्ट्र बैंकं धाःगु दु ।

भण्डारण यायेथाय् मदुगुलिं म्होतिं नं स्वदँ तक ध्यबा काये मफइगु खँ राष्ट्र बैंकं धाःगु दु । तर राष्ट्र बैंकं पुलांगु नोट धाःसा कायेगु यानाच्वंगु दु । न्हूगु ध्यबा अप्वः दुगुलिं यानाः ध्यबा तयेगु थाय् मदयाः ध्यबा दुकाये मफयाच्वंगु खँ राष्ट्र बैंकं स्वीकार याःगु दु ।