आः लाइसेन्सया पलेसा क्युआर कोर्ड दुगु रसिद

येँ (नेपालभाषा टाइम्स)-प्रदेश स्तरीय सवारी लाइसेन्सया ट्रायल पास जुइपिंत बीगु रसिदय् आः फोटो व क्युआर कोड तइगु जूगु दु । यातायात व्यवस्था विभागं इनीगु स्मार्ट लाइसेन्स इमर्जेन्सी बाहेक छापे मयायेगु निर्णय यायेवं तत्कालया नितिं प्रदेश मन्त्रालय अन्तर्गतया यातायात कार्यालयं ट्रायल पास जुइपिंत सम्बन्धित मनूया फोटो व क्युआर कोड तयाः रसिद बीगु निर्णय याःगु खः ।

यातायात व्यवस्था विभागया महानिर्देशक उद्धवराज रिजालया कथं थौंकन्हय् न्हय्गुलिं प्रदेशया ४३ गू थाय्या ट्रायल सेन्टरय् न्हिं ५ निसे ६ हजार मनुखं ट्रायल पास यानाच्वंगु दु । विभागं सामान्य अवस्थाया नागरिकयात बियाच्वंगु स्मार्ट कार्ड छापे यायेगु बन्द याःगु व प्रदेशं तत्काल स्थायी प्रकृतिया व्यवस्थापन यायेत थाकुगुलिं रसिदय् हे फोटो व क्युआर कोड तयाः इना बीगु निर्णय याःगु खः ।

यातायात विभागं थौंकन्हय् मेसिनया सफ्टवेयर स्यंगु व संविधानतः लाइसेन्स छापे यायेगु प्रदेश सरकारया एकल अधिकार जूगुलिं कानुनी व्यवस्था न्ह्यथँसें वंगु साउनया लिपांगु वाःनिसें इमरजेन्सी बाहेकया स्मार्ट कार्ड छापे मयायेगु निर्णय याःगु खः । थौंकन्हय् देय्न्यंकं १७ लाख स्वयां अप्वः नागरिक ट्रायल पास यानाः स्मार्ट लाइसेन्स पियाच्वंगु दु ।