गैंडा भकाभक छाय् सिनाच्वन ?

येँ – चितवन राष्ट्रिय निकुञ्ज दुने वंगु छुं दँ न्ह्यवंनिसें चोरी निकासीपाखें गैंडा मसीसां प्राकृतिक कारणं धाःसा यक्व गैंडात सिनाच्वंगु विषयय् सरकारं छानबीन याइगु जूगु दु । वंगु छुं ई न्ह्यवंनिसें लगातार गैंडात सिनाच्वंगु कारण पत्ता लगे यायेत सरकारं छानबीन यायेत्यंगु खः ।
थुगु दँय् जक चितवन राष्ट्रिय निकुञ्ज दुने ३१ म्ह गैंडा प्राकृतिक कारणं सीधुंकूगु दु ।

जब कि थ्व दँय् निकुञ्ज दुने चोरी शिकारीपाखें छम्ह हे गैंडा सीगु मदु । थ्व सीपिं मध्ये २९ म्ह गैंडा राष्ट्रिय निकुञ्ज दुने हे सिनाच्वंगु लूगु खःसा निम्ह निकुञ्जं पिने सिनाच्वंगु लूगु खः । गुलिखे गैंडात सिनाच्वंगु यक्व लिपा जक पत्ता लगे जूगुलिं उपिं ध्वगिनाः क्वँय् जक ल्यनाच्वंगु अवस्थाय् नं लूगु दु ।

तर थ्व गैंडात छुं कथंया ल्वय् जुयाः सीगु खः वा थवंथवय् ल्वानाः सीगु खः वा छुं प्राकृतिक प्रकोप हे जुयाः सीगु खः धइगु खँ धाःसा सी मदुनि । थ्वहे खँ पत्ता लगे यायेगु लागिं सीपिं गैंडाया शरीरया थीथी अंगत यंकाः परीक्षण यायेत्यंगु खः ।

सन् २०१५ य् जूगु गैंडा गणना लिपा देय्न्यंकं ९६ म्ह गैंडा प्राकृतिक कारणं सीधुंकूगु दु । नेपाःया चितवन राष्ट्रिय निकुञ्ज संसारय् हे दकलय् अप्वः गैंडा दुगु जंगल मध्ये छगू खः । गैंडायात संसारं लोप जुइत्यंगु दकलय् पुलांगु वन्यजन्तुया रुपय् कायेगु याः । गैंडा संरक्षणया लागिं विश्वं हे गहन रुपं ध्यान बीगु यानाच्वंगु दु ।

सम्बन्धित बुखँ

LEAVE YOUR COMMENTS