स्वनिगःया स्कुल, होस्टलय् क्वारेन्टाइन दयेकीगु

येँ – स्वनिगलय् तत्काल न्याद्वः मनू न्ह्यनीगु सार्वजनिक क्वारेन्टाइन दयेकेगु तयारी शुरु जूगु दु । उकिया निंतिं स्वनिगलय् दुगु होटल, होस्टल, स्कूल व रंगशालायात छ्यलेगु तयारी सरकारं याःगु दु । कोभिड–१९ संक्रमण, रोकथाम तथा नियन्त्रण उच्चस्तरीय समन्वय समितिं शनिवाः नीस्वंगु क्वारेन्टाइनस्थल निर्माण तथा व्यवस्थापन कार्यदलया म्हिगः च्वंगु न्हापांगु बैठकं उगु निर्णय याःगु खः ।

संस्कृति, पर्यटन तथा नागरिक उड्डयन मन्त्री योगश भट्टराईया नेतृत्वया च्वंगु कार्यदलया बैठकं अज्याःगु क्वारेन्टाइनस्थलयात माल धाःसा अस्थायी अस्पतालया रुपय् हिले फइगु निर्णय नं याःगु दु ।

सरकारं पर्यटन व्यवसायी व निजी विद्यालयतलिसे समन्वय यानाः स्वनिगः दुने हे प्यद्वः मनू न्ह्यनीगु क्वारेन्टाइन दयेकेगु योजना तयार याःगु खः । उकिया निंतिं होटल व विद्यालयं थःपिंके गुलि क्षमता दु उकिया विवरण बीत नं सरकारं निर्देशन बिउगु दु ।

उकथं हे राष्ट्रिय खेलकुद परिषद्लिसे समन्वय यानाः देय्न्यंकं दुगु रंगशालायात नं क्वारेन्टाइन दयेकेगु कथं तयारी यानाच्वंगु खँ सीदुगु दु ।