ने. सं. ११४३ चौलाथ्व तृतीया -

छेँ थुं वःगु डोजर जनतां पना बिल

यल- यलया सातदोबाटोय् म्हिगः सतक तब्या यायेगु धकाः छेँ थुनेत याःगु कुतः स्थानीय जनतां विफल याना बिल ।
स्थानीय जनतां थःपिंत मुआब्जा मबिउगु धासें न्हापा मुआब्जा बियाः जक छेँ थुनेमाःगु माग याःगु खः । लगंख्यः व सातादोबाटो दथुइ लागू झिंस्वखा छेँ थुनेगु ल्यं दनिगु खःसा स्थानीय वडाध्यक्ष सहित वयाः छेँ थुनेगु कुतः याःगु खः ।
तर स्थानीय जनतां विरोध यायेवं लछिया दुने थःपिंसं हे छेँ थुनेमाः, मखुसा यल महानगरपालिकां डोजर हयाः छेँ थुनेगु जुइ धकाः वडाध्यक्षं ख्याच्वः बिया थकूगु खँ धाःगु दु ।

मेखे स्थानीय जनतां थःपिंसं मुआब्जा काये धकाः भ्वं यानातयेधुंकूगुलिं यल मनपां डोजर छ्वयाः छेँ थुनेगु कुतः याःगु खँ सतक पीडित संघर्ष समितिया संयोजक सुमन साय्मिं ‘नेपालभाषा टाइम्स’ यात कनादीगु दु । उमिसं भ्वं यानातये धुंकूगु कारणं संघर्ष समितिं छुं याये मफुगु खँ वय्कलं कनादिल ।

यदि सुनां नं भ्वं मयाःगु खःसा उकियात आधार दयेकाः आन्दोलन यायेगु वा अदालतय् मुद्दा तये फइगु खँ कनादिसें वय्कलं स्थानीय जनतायात थःपिंसं अज्याःगु सम्झौता मयानागु खःसा संघर्ष समितियात स्वापू तयेत नं इनाप यानादीगु दु ।

सतक विस्तार सम्बन्धी सर्वोच्च अदालतया निर्णयपाखें पीडित जनताया त्याःगुलिं आः उपत्यका विकास प्राधिकरणया हाकिमत तिरमिरय् जुयाच्वंगु दु धासें मेमेथाय् नं डोजर छ्यलेगु ज्या न्ह्याके फइगु जूगुलिं सकसितं मुआब्जा मकायेत नं वय्कलं इनाप यानादीगु दु ।