रेशमप्रति पूर्वाग्रह
येँ (नेपालभाषा टाइम्स)- थारु आन्दोलनया न्ह्यलुवा रेशम चौधरीया मुद्दाबारे सर्वोच्च अदालतया पूर्ण पाठ सार्वजनिक जुइवं वय्कःयात आम माफी बीगु सरकारया निर्णय विवादय् लाःगु दु ।
नेपाल सरकारं वय्कःयात आम माफी बीगु धकाः निर्णय यायेवं राष्ट्रपति रामचन्द्र पौडेलं उकियात प्रमाणीकरण यानादीगु खःसा थ्वयां लिपा चौधरीयात त्वःतूगु खः । तर वय्कःया मुद्दा सम्बन्धी फैसलाया पूर्ण पाठय् सर्वोच्च अदालतं विसं. २०७२ सालया भदौ ७ गते टीकापुरय् जूगु घटनायात तसकं क्रूर व नृशंस घटना धासें उकिया नेतृत्व याःम्ह नेता रेशम चौधरीयात आम माफी बी मफइगु व बिल धाःसा थ्व संविधानया अःखः जुइगु धकाः नं ब्याख्या यानातःगु दु ।
टिकापुर घटनाय् च्याम्ह सुरक्षा–कर्मी व छम्ह मचाया ज्यान वंगु खः । उकी लानाः सीपिं सकलें सुरक्षाकर्मी–तय्त अतिकं अमानवीय ढंगं भालां सुयाः स्याःगु धासें अदालतं थुकियात गबलें ल्वःमंके मफइगु घटना धकाः नं व्याख्या याना बिउगु दु ।
तर थुकी नां वःम्ह रेशम चौधरीं थः उगु घटना जूगु इलय् टीकापुरय् द हे मदु धकाः तःक्वः बयान बिउसां सर्वोच्चं धाःसा उकियात अस्वीकार याःगु दु । घटना जूगु इलय् रेशमयात अन खना धाःपिं यक्वं मनूत दु धकाः नं अदालतं धाःगु दु । तर खंपिं मनूतय्गु नां धाःसा धाःगु मदु ।
थ्वहे झ्वलय् थारु आन्दोलनकारी– तय्सं टीकापुर घटनाया कन्हय् कुन्हुं–निसें हे सरकारं कफ्र्यु तयाः याःगु आतंकया खँ नं ल्ह्वना हःगु दु । उगु आतंक बारे छानबिन यायेत गठन जूगु लाल आयोगया प्रतिवेदन आः तक सरकारं सार्वजनिक याःगु मदुनि । उगु आयोगया रिपोर्टय् टीकापुर घटना लिपा गुकथं अन च्वंपिं थारुतय्त प्रशासनं दमन यात, गुकथं मिस्तय्त दुव्र्यवहार यात, गुकथं उमिगु छेँ च्याकाः घरवारविहिन याना बिल धइगु खँ उल्लेख यानातःगु दु । उगु प्रतिवेदन सार्वजनिक जुल धाःसा समाजय् विद्वेष न्यना वनी धकाः सरकारं सार्वजनिक मयाःगु खः ।
टीकापुर घटनायात अमानवीय धाःथें थारु समुदाययात जूगु घटना नं तसकं अमानवीय जूगु खँ धाःगु दु । उगु घटना याःपिं प्रहरीतय्त कारवाही यायेमाः लाकि म्वाः धइगु न्ह्यसः धाःसा आः हानं पिहां वःगु दु । थारुतय्सं आः उगु रिपोर्ट सार्वजनिक या धकाः आन्दोलन यायेत्यंगु खँ सीदुगु दु ।
LEAVE YOUR COMMENTS