छाय् ग्यानापु, सीभियर डेंगू
सिभीयर डेंगू तसकं ग्यानापुगु ल्वय् खः । छाय्कि थ्व जुलकि ल्वगिया म्हया थीथी ब्वं हि पिहां वइ । अले थ्व हिया माध्यमं ब्लड प्लाज्मा म्हं पिहां वनेगु याइ । सीभीयर डेंगूया ज्वरं स्येँ, स्वँ व नुगःस्येँयात ड्यामेज यायेफु। गुलिं गुलिं मामलाय् ल्वगिया ब्लडप्रेसर थुलि म्ह जुयावनी कि वयागु ज्यान हे वनी ।
सीभीयर डेंगूया मेमेगु लक्षण थुकथं दु :
१) च्व व खिलिसें हि वइगु ।
२) हियालिसें प्लाज्मा पिहां वइगु ।
३) सासः ल्हाये थाकुइगु व स्येस्यें वइगु ।
४) स्येँ, नुगःस्येँ अथवा म्हया मेमेगु अंगय् तीव्र गतिं हिउपाः वइगु व मना वइगु ।
५) ल्वगिया दिमागी अवस्था स्यनीगु व वें थें सनीगु आदि ।
सीभियर डेंगूया थज्याःगु थीथी लक्षणया लिसेलिसें ल्वगितय्गु म्हं प्लेटलेट्सया ल्याः तीव्र गतिं कुहां वनी । इमिगु म्हया अंगं ज्या यायेगु त्वःता बीफु, अले इपिं सीफु।
उपचार
डेंगू मजुइका च्वनेगु हे उकिया उपचार खः । सामान्य डेंगू जूसा आम कयाः यक्व मात्राय् तरल पदार्थ कयाः, थः च्वंच्वनागु थाय्या जःखः सुचुपिचु यानाः लंकेफइ । तर सीभियर डेंगूया आः तकं पाय्छिगु उपचार लुइके फुगु मदुनि। सामान्यतया सीभियर डेंगूया ल्वगियात यदि गुलिफु उलि याकनं डाक्टर क्यनाः आइसीयुलय् भर्ना यानाबिल धाःसा ल्वगि म्वाइगु सम्भावना दइ ।
उपचारया झ्वलय् ल्वगियात थुपिं ट्रीटमेन्ट बीगु याइ :
१) हि व प्लेटलेस बीगु २) म्हय् लः गाक्क तयेत नसाया ग्वाहालिं ल्फ्युइड थ्यंकाबीगु ३) सासः ल्हाये थाकुयाच्वंगु दुसा अक्सिजन थेरापी बीगु आदि ।
डेंगू मजुइकेगु गुकथं?
१) डेंगू मजुइकेगु खःसा अज्याःपिं पतितय्सं न्याये मफयेका च्वनेमाः, गुपिं डेंगू भाइरस पुंकीपिं खः ।
२) अज्याःगु थाय् गन डेंगू न्यनाच्वनीगु दु, अज्याःथाय् लः मुंके मबीगु गथेकि प्लास्टिक ब्याग, क्यान, गमला, सतक वा कूलरय् मुनाच्वंगु लः ।
३) पतिं मन्याकेगु निंतिं यक्व कुतः यायेमाः । गथेकि : झूल तयेगु, छगः लंचा दुगु लं फीगु आदि ।
सीभियर डेंगू मस्तय्त व तःधिकःपिंत निखलःसितं जुइफु। अथे खःसां थुकिया खतरा मस्तय्त आपाः दु। थज्याःगु कथंया डेंगूया यदि इलय् हे उपचार मजुल धाःसा ल्वगिया ज्यान तकं वनेफु ।
लक्षण
सीभियर डेंगू सुरु जुइस्वयां न्ह्यः ल्वगियाके डेंगूया सामान्य लक्षण खने दयावइ । गथेकि : ज्वर वइगु, छ्यं तसकं स्याइगु, वाक्वाक् वइगु, म्हय् थाय् थासय् ह्याउँक फ्वता वइगु, प्लेटलेटस मगाइगु आदि । थ्व झ्वलय् ल्वगिया हे हि जाँचे यानास्वत धाःसा डेंगूया हे पुष्टि जुइ । तर स्वन्हुनिसें न्हय्न्हु लिपा ल्वगियाके सीभियर डेंगूया लक्षण खने दयावइ । सीभियर डेंगूया दकलय् म्हसीके अःपुगु लक्षण धयागु म्ह ख्वाउँया वनीगु खः । (३८डिग्री सेल्सियस स्वयां कम तापक्रम) थ्व बाहेक सीभियर डेंगूया मेमेगु लक्षण थुकथं दु :
१) प्वाः तसकं स्याइगु
२) तसकं स्येंस्यें वइगु
३) याकनं याकनं बान्ता वइगु
४) बान्ता यायेबलय् हि वइगु
५) म्हय् लः जायावइगु
६) गिजां वा न्हासं हि बाः वइगु
७) प्लेटलेट्स तीब्र गतिं कुहां वनीगु
८) सने मफइगु व अय् च्वने थय् च्वने मफइगु आदि ।
सीभियर डेंगूया थज्याःगु लक्षण खने दत धाःसा गुलिफु उलि याकनं डाक्टर क्यनेगु यायेमाः । हिला हिला वनीगु मौसमय् यदि छिं न्हूगु थासय् झायेत्यनागु दुसा पतिं न्याके मबीगु यानादिसँ । छिगु छेँया जःखः गनं लः मुनाच्वंगु दुसा व सफा यानादिसँ । खुन्हु तक नं ज्वर मलन धाःसा हि जाँचे याका हे दिसँ ।
डेंगू मजुइकेगु खःसा पतिं मन्याकेगु याये हे माः । लुमंकादिसँ, डेंगूया पतिं न्हिनय् हे जक न्याइ । अथे जुयाः, न्हिनय् पतिपाखें बचे जुयादिसँ । पतिं न्याये मफइगु क्रिम बुलादिसँ । छगः लंचा दुगु लं फिनादिसँ । खास यानाः वा वइगु मौसमय् छगः लंचा दुगु कमिज लं फिनादिसँ । चप्पलया थासय् लाकां हे न्ह्यानादिसँ । छेँय् कूलर, गमला व झंगःतय्त त्वंकेत तयातःगु लःथलया लः सफा याना तयादिसँ । छेँयागु लःया ट्यांकीइ बांलाक पुसा तयादिसँ ।
LEAVE YOUR COMMENTS