प्वाथय् दइबलय् सेखं चाःसा छु यायेगु ?

प्वाथय् दइगु इलय् सेखंनं तसकं हे हीमी चायेको बीफु । थज्याःगु इलय् चिकित्सकतय्सं छुं कथं वासः नयेगु सल्हा नं बीमखु । थज्याःबलय् सेखनं गुकथं तापायेगु ले ?

प्वाथय् दुम्ह मिसायात सेखं चाइगु सम्भावना अप्वः दयाच्वनी, छाय्धाःसां थज्याःगु इलय् वयागु प्रतिरोधात्मक क्षमता म्हो जुयाच्वनी । थज्याःगु अवस्थाय् चिकित्सया सल्हा मकासे छुं नं कथंया वासः नयेमजिउ । सेखं चाइगु इलय् नइगु वासः नं प्वाथय् च्वनाच्वंम्ह मचाया निंतिं खतरनाक जुइफु ।

कफ पाखें बचे जुइ
गर्भावस्थाय् सेख चाइबलय् फयांफक्व कफ मजुइके बीमाः । थुकिया निंतिं छुं ई पाकाः न्हाय् सफा यानाच्वनेमाः, गुकिं यानाः न्हाय गनाः बन्द जू थें जुइफइमखु । क्वाःलःया भाप कायेथज्याःबलय् सेखं चाल धाःसा वासः नयेगु हानिकारक जुइ धयागु च्वय् हे न्ह्यथनेधुंगु जुल ।

उकिं क्वाःलःया भाप कयाः नं सेखं लंके फइ । थुकिं छातिइ जमा जुयाच्वंगु कफ पिहां वयेत ग्वाहालि याइ । न्हाय् बन्द जुयाच्वंसां आराम बी, साइनसया समस्या नं ज्यंकी ।

म्हय् लःया कमी मयाये
यदि नये मयःसा वा नयेगु मन हे मजूसा लः गाक्क त्वनेगु कुतः यानादिसँ, गुकिं यानाः म्हय् लःया कमी मजुइमाः । नये यःबलय् ठीक ढंगं गाक्क नयेगु याये ।

आराम कयादिसँ
सेखं चायाच्वनीबलय् काचाक्क न्ह्यः वयेकेफइमखु । उकिं ग्वतुला आराम काये । थज्याःगबलय् फुसा आलाहां न्ह्यः वयेकेगु कुतः याये । द्यनेगु इलय् सासः ल्हाये थाकुयाच्वंसां फ्वंगा मिले यानाः आराम जुइकथं ग्वरातुलेगु याये ।

कथु स्याःसा
सेखं चाइगु इलय् कथु स्याइगु नं सामान्य हे खः । यदि कथु स्यात धाःसा हाकुगु च्या त्वने, थुकी कस्ती ल्वाकछ्यानाः त्वँसां जिउ । थुकिया लिसें क्वालखय् चि ल्वाकछ्यानाः गलगल याये । थुकिं कथुयात आराम जुइ ।

हर्बल वासः
गर्भावस्थाय् सेखं चाल धायेवं छक्वलं हर्बल वासः नं नयेमजिउ । थुकिया निंतिं नं चिकित्सकया सल्हा कायेगु बांलाइ । छाय्धाःसा हर्बल वासः नं गुलिं गर्भावस्थाय् बांलाःगु जुइसा गुलिं बांमलाःगु नं जुइफु ।

स्वस्थ नसा–त्वँसा
गर्भावस्थाय् सेखं पाखें बचे जुइगु बांलाःगु उपाय धयागु हे नयेत्वनेगुली ध्यान बीगु खः । नयेबलय् सिसाबुसा, तरकारिया लिसें थीथी नट्स (काजु, मस्र्याबरां आदि) नयेगु यायेमाः । थुकिं प्रतिरोधात्मक क्षमता अप्वयेकाबी, गुकिं यानाः सेखं लिसे ल्वायेत ग्वाहालि जुइ । नयेबलय् क्वाःगु व ख्वाउँगु छक्वलं नयेगु यायेमजिउ, थुकिं सेखं चायेकीगु सम्भावना अप्वः जुइ ।