कोरोनाया दथुइ एसईई जाँच

येँ – कोरोना भाइरसं यानाः फुक्क हे स्कूलत याकनं बन्द यायेगु तयारी सरकारं याःगु दुसां थुगु दँया एसईई परीक्षा छु यायेगु धइगु बारे धाःसा न्ह्यसः पिहां वःगु दु । चैत्र ६ गतेनिसें देय्न्यंकं छक्वलं एसईई परीक्षा शुरु जुइ । छक्वलं लाखौं विद्यार्थीत सहभागी जुइगु थ्व जाँच छु यायेगु धकाः शैक्षिक ख्यलं चिउताः तयाच्वंसां सरकारं धाःसा एसईई जाँच मदिकेगु निर्णय याःगु खँ सीदुगु दु । चैत्र ६ गतेनिसें निर्धारित इलय् हे एसईई जाँच कायेगु तयारीपाखे सरकार न्ह्यायेधुंकूगु दु । उकिया लागिं देय्न्यंकं न्ह्यसःपौ समेत वनेधुंकूगु कारणं थ्व जाँच दिकेगु अवस्था आः मदुगु खँ धाःगु दु ।

छुं जुयाः जाँचया इलय् सुं परिक्षार्थीयात ज्वरो वल वा सेखं चाल धाःसा वयात अलग्ग तयाः जाँच बीकेगु व्यवस्था यायेत्यंगु खँ धाःगु दु । उकिया लागिं परीक्षा नियन्त्रण कार्यालयं स्वास्थ्य मन्त्रालयलिसे खँ ल्हानाच्वंगु दु । लिसें जाँचजःछिया लागिं फुक्क हे परीक्षा केन्द्रय् छम्ह छम्ह स्वास्थ्यकर्मी ‘स्टाय्ण्डबाई’ तया तयेगु बारे नं सहलह जुयाच्वंगु नं सीदुगु दु । यदि थुकी निर्णय जुल धाःसा सरकारं याकनं हे उकिया सुचं समेत जारी याइगु खँ नं धाःगु दु ।

थ्वहे झ्वलय् सरकारं फुक्क हे स्कूलतय्त चैत्र ५ गते तकया दुने फाइनल जाँच कयाः स्कुलय् बिदा बिया छ्वयेत इनाप याःगु दु । निजी स्कुलतय् संस्थां उकियात सकारात्मक रुपं काःगु दु । मेखे म्हिगः तिनि येँया जिल्ला प्रशासन कार्यालयं छगू सार्वजनिक सुचं जारी यासें अत्यावश्यक ज्याय् बाहेक सर्वसाधारण मनूतय्त छेँनं हे पिहां मवयेत इनाप याःगु दु । लिसें पुचः पुचः मुनाः याइगु छुं नं कथंया सभा, समारोह वा भेला मयायेत व मनूतय्त भीडभाडपूर्ण थासय् मवनेत नं इनाप याःगु दु । न्ह्यःनेवयाच्वंगु होलि पर्व न्हापा थें पुचः मुनाः माने मयायेत नं जिप्रकां इनाप याःगु दु ।