विदेशया उडान पनेत आदेश

येँ – सर्वोच्च अदालतं चीन व कोरिया लगायत मेगु न्यागू देशं वइपिं यात्रुतय्त कडा जाँच यायेत व ट्रान्जिट फ्लाइट पनेत आदेश बिउगु दु । विश्वन्यंकं कोरोना भाइरसया संक्रमण न्यना वनेगु क्रम अप्वया वनेवं आपालं देशं हवाई उडान पनेधुंकूगु दुसा नेपालं धाःसा अज्याःगु निर्णय याःगु मदुनि ।

सर्वोच्च अदालतया न्यायाधीश तेजबहादुर केसीया याकःचिया इजलासं जापान, बहराइन, इरान, इटाली व दक्षिण कोरियां वइगु सीधा फ्लाइट व ट्रान्जिट फ्लाइट बन्द यायेत आदेश बिउगु खः । अधिवक्ता पूर्ण राजवंशीं दर्ता याःगु रिटयात कयाः म्हिगः
सर्वोच्चं उगु आदेश बिउगु खः । थ्वहे झ्वलय् म्हिगः च्वंगु मन्त्रिपरिषद्या बैठकयं उगु न्यागू देय्या नागरिकयात ‘अनअराइभल’ भिसा मबीगु निर्णय याःगु दु । आः उगु न्यागू देय्या नागरिकतय्सं विदेशय् भिसा कयाः स्वास्थ्य परीक्षणया रिपोर्ट नेपाः छ्वया हयेधुंकाः जक नेपाः वयेफइगु खँ धाःगु दु । म्हिगः तक विश्वन्यंकं कोरोना भाइरसया कारणं स्वद्वः स्वयां अप्वः मनूत सीधुंकूगु दु ।

थ्वहे झ्वलय् चीनया वुहानं उद्धार यानाः ख्वपया नेपाल विद्युत प्राधिकरणय् तयातःपिं विद्यार्थीत म्हिगः थःथःगु छेँय् लिहां वंगु दु । झिंखुन्हु तक आइसोलेसनय् च्वनेधुंकाः उमिगु लिपांगु स्वास्थ्य रिपोर्ट नेगेटिभ जुइवं म्हिगः उमित थःथःगु छेँय् छ्वया बिउगु खः ।
झिंखुन्हु तक आइसोलेसनय् च्वनेधुंकाः छेँय् लिहां वने खंगुलिं उपिं तसकं लय्ताःगु खः । थ्व स्वयां न्ह्यः विद्यार्थीतय्त उद्धार यानाहःगु नेपाल वायुसेवा निगमया जहाजया चालक दलया पुचः वंगु आइतवाः हे थःगु छेँय् लिहां वंगु खः ।

मेखे सरकारं नेपाःमितय्त विदेश यात्राय् मवनेत इनाप यासें ‘ट्राभल एड्भाइजरी’ जारी याःगु दु । कोरोना भाइरसया संक्रमण विश्वन्यंकं न्यना वंगुलिं सरकारं ट्राभल एडभाइजरी जारी याःगु खः । नागरिकतय्त थ्व इलय् विदेश भ्रमणया योजना मदयेकेत नं सरकारं अपील याःगु दु । परराष्ट्रमन्त्री प्रदीप ज्ञवालीं म्हिगः सरकारया निर्णय बारे जानकारी बिसें कोरोना भाइरसया गम्भीर संक्रमण खनेदुगु देशय् अत्यावश्यक ज्याय् बाहेक मेबलय् मवनेत इनाप यानादीगु खः ।

सरकारं वैदेशिक रोजगारीइ वनेगु योजना तत्कालया निंतिं स्थगित यायेत नं अपील याःगु दु । ज्ञवालीया कथं दक्षिण कोरियाय् एपीएल प्रणालीं ज्या यायेत वनीपिंत मछ्वयेगु व विदेशय् ब्वं वनीपिं विद्यार्थीयात एनओसी (नो अब्जेक्सन लेटर) बीगु ज्या नं बन्द यानागु खँ धाःगु दु ।थ्वहे झ्वलय् म्हीग भारत भ्रमणं लिहां झाःपिं पुलांम्ह जुजु ज्ञानेन्द्र शाह व वय्कःया जहान मय्जु कोमल शाहयात नं नेपाःया त्रिभुवन अन्तर्राष्ट्रिय विमानस्थलय् ज्वरो नापे यानाः स्वःगु खः । वय्कःपिनि ज्वरो नापे याःगु किपा सामाजिक सञ्जालय् भाइरल जुयाच्वंगु दु ।