बालेनया युट्युबरतय्त लिना छ्वल

येँ (नेपालभाषा टाइम्स)- आन्दोलनय् वयाच्वंपिं बालेन साहपाखें परिचालित युट्युबरतय्त नं म्हिगः आन्दोलनकारीतय्सं ख्यानाछ्वःगु खः । आन्दोलनय् वयाः स्थानीयवासीया खँयात वेवास्ता यासें बालेनं याःगु ज्या पाय्छि धकाः भ्रम न्यंकेगु ज्या यानाच्वंपिं स्वम्ह युट्युबरतय्त म्हिगः अनं ख्यानाछ्वःगु खः । उकी मध्ये कृष्ण कट्टेल नांयाम्ह छम्ह युट्युबरतय्त गःताः ज्वनाः दाया छ्वःगु खः । वयात लिपा प्रहरी वयाः बचे याना यंकल । थःपिंत ‘मिडियां वयापिं’ धकाः परिचय बिउपिं थ्व युट्युबरतय्सं परिचय पत्र क्यँ धाःबलय् धाःसा क्यने मफयेवं उमित दाया छ्वःगु खः । आन्दोलनकारीतय्सं धाःकथं न्हूसतकय् नगर प्रहरी थ्यने न्ह्यः हे थुपिं थ्यंकः वयाच्वंगु दइ । थुमित बालेन साहपाखें हे परिचालित यानाः अन छ्वया हइगु खँ स्पष्ट जूगु थुकिं सीदु । अन वयाच्वंपिं स्वम्ह युट्युबरतय्त आन्दोलनकारीतय्सं दाया छ्वयेवं मेपिं फुक्क अनं तुं बिसिउँ वंगु खः ।