दाहालयात लाकामं कयेकल

येँ -नेपाल कम्युनिष्ट पार्टीया अध्यक्ष पुष्पकमल दाहालयात म्हिगः लाकामं कयेकूगु दु । राष्ट्रिय सभागृहय् तत्कालीन नेकपा एमालेया नेता लिसें पुलांम्ह अर्थमन्त्री भरतमोहन अधिकारीया न्हापांगु लुमन्ति ज्याझ्वलय् दाहालयात लाकामं कयेकूगु खः । लाकामं कयेकूम्ह रतन तिरुवायात म्हिगः हे प्रहरीं ज्वंगु खः ।

प्रहरीं ज्वनेधुंकाः थःगु बयान बीगु झ्वलय् तिरुवां अध्यक्ष दाहालं जनयुद्धया झ्वलय् ल्हाःगु खँ व आः वयाः ल्हाःगु खँ पाःगु धासें थम्हं लाकामं कयेकागु खँ धाःगु दु । बयानय् तिरुवां धाल, ‘जनयुद्धया झ्वलय् दाहालं क्यंगु म्हगस ल्वःमंकल, उगु इलय् ल्हाःगु खँ आः वयाः पूवंके मफुत, ज्याझ्वलय् दाहालं आदर्शवादी खँ ल्हायेवं जितः चित्त बुझे मजुल, वयां लिपा जिं लाकामं कयेका बिया ।’ वयात आः मुद्दा न्ह्याकीगु जूगु दु ।

प्रहरीया कथं जुम्लाय् स्थायी छेँ दुम्ह तिरुवाया अबु मनु तिरुवायात माओवादी युद्धय् तत्कालीन राज्य पक्षं स्यानाबिउगु खः । तिरुवाया कका ररिविकिरण तिरुवा थौंकन्हय् नेत्रविक्रम चन्द नेतृत्वया पार्टीइ जुम्ला जिल्ला इन्चार्ज जुयाच्वंगु दु ।

थ्व स्वयां न्ह्यः तत्कालीन माओवादीं भृकुटीमण्डपय् नेपाल संवत् ११३३ या लसताय् ग्वसाः ग्वःगु भिंतुना तुच्चा ज्याझ्वलय् नं दाहालयात बाग्लुङया पदम कुँवरं न्यतालय् दाःगु खः । दाहालयात स्वांमाः क्वखायेकेगु झ्वलय् कुँवरं न्यतालय् दाःगु खः ।

सम्बन्धित बुखँ

LEAVE YOUR COMMENTS