जगतसुन्दर ब्वनेकुथि ३० क्यंगु लसताय् विशेष ज्याझ्वः

येँ- मां भासं आखः ब्वंका वयाच्वंगु देय्या हे न्हापांगु ब्वनेकुथि जगतसुन्दर ब्वनेकुथि ३० क्यंगु लसताय् विशेष ज्याझ्वः जुल । ब्वनेकुथिया थःगु हे प्रांगणय् ब्वनेकुथि संचालक समितिया नायः लक्ष्मीदास मानन्धरया सभापतित्वय् जूगु ज्याझ्वलय् येँ महानगरपालिकाया प्रमुख विद्यासुन्दर शाक्य मूपाहांकथं झायादीगु खः । ज्याझ्वलय् वाङ्मय शताब्दीपुरुष सत्यमोहन जोशी, येँ मनपा १५ वडा अध्यक्षलिसें महानगपालिकाया प्रवक्ता ईश्वरमान डंगोल, येँ मनपा शिक्षा विभागया शिक्षा अधिकृत तारापति खरेल, ब्वनेकुथि संचालक समितिया दुजः डा. चुन्दा वज्राचार्य विशेष पाहांकथं झायादीगु खः ।

ब्वनेकुथिया प्रिन्सिपल सुनिता मानन्धरं लसकुस यानादीगु ज्याझ्वलय् शताब्दीपुरुष जोशीयात दोसल्लां न्ययेकाः हनेज्या याःगु खःसा ब्वनेकुथि स्थापनाकालनिसें थौंतक योगदान बियादीपिं स्वम्ह शिक्षिकापिं संस्थापक प्रिन्सिपल रत्नदेवी कसाः, पुलांम्ह प्रिन्सिपल माया मानन्धर व शिक्षिका भगवती महर्जनयात कदरपत्रलिसें म्हति छगू छगू लख तका दांलिसें हनेज्या याःगु खः ।

अथे हे नीन्यादँ व व स्वयां अप्वः ब्वनेकुथिय योगदान बियादीपिं प्रिन्सिपल सुनिता मानन्धर व शिक्षिका मधु दर्शनधारीयात कदरपत्र लःल्हासे हंगु खःसा ब्वनेकुथिया उत्कृष्ट शिक्षिककथं रोशना शाक्ययात न्याद्वःतका दांलिसे कदरपत्र लःल्हाःगु खः ।
उगु हे ज्याझ्वलय् मिस नेवाः–११३९य् उपाधि त्याकेत सफल ब्वनेकुथिया पूर्व विद्यार्थी नितु डंगोल, मिस ट्यालेन्ट त्याकेत सफल सुजिना श्रेष्ठ, मिस एसइइया सेकेन्ड रनरअप प्रिया खड्गीयात नं हनेज्या याःगु खः ।

थुकथं हे ज्याझ्वलय् एसइइ परीक्षाय् नेपालभाषा विषय कयाः सर्वोत्कृष्ट ल्याः हयादीपिंत स्वम्ह विद्यार्थी सुमितरत्न सिन्दुराकार, विद्या खड्गी व सुकुन्दा श्रेष्ठयात शान्ति सिरपाः व विरञ्ची–मोति सिरपाः नं लःल्हाःगु खः ।

ब्वनेक्ुथिया हे पुलांम्ह सहायक प्रिन्सिपल शान्ति मानन्धरया नामं नीस्वनातःगु उगु सिरपाः दाता ज्ञानेन्द्र मानन्धरं लःल्हानादीगु खः । सिरपाःकथं पदक, दसिपौ व म्हतिं निद्वःतका दां लःल्हाःगु खः।

अथे हे इपिं पूर्णहरी, गुह्येश्वरीराज, बुद्धशरण व डा. धर्मशरण मानन्धरं थः मांअबुया नामं नीस्वनादीगु विरञ्ची–मोति सिरपाः नेपालभाषा विषयय् उत्ृकष्ट ल्याः हयादीपिं स्वम्हं विद्यार्थीयात लःल्हाःगु खः । सिरपाःकथं दसिपौ व म्हति न्याद्वः तका दां लःल्हाःगु खः ।
ज्याझ्वलय् ब्वनेकुथि नीस्वनेगुनिसें थौंया इलय् तक नं मदिक्क ग्वाहालि याना वयाच्वंगु जापान हिकिभाया नायः सोजा हामाजाकिं ब्वनेकुथि ३० क्यंगु लसताय् भिंतुना पौलिसें थीथी उपहार नं लःल्हानादीगु खः ।