नेकपाय् संविधान संशोधन विवाद

येँ -सत्तारुढ दल नेकपां राष्ट्रिय सभाया सांसद नं प्रधानमन्त्री जुइ दइ कथं संविधान संशोधन यायेत न्ह्याकूगु तयारी दथुइ हे त्वाःदःगु दु । संविधान संशोधनया तयारी यायेत धकाः गठन याःगु कार्यदलया दुजःतय्सं हे उकिया विरोध यायेवं संशोधनया ज्या दथुइ हे दीगु सम्भावना खने दया वःगु खः ।
सूत्रतय् कथं पार्टी दुने प्रधानमन्त्री केपी ओलीयात याकःचा लाकेगु लागिं वामदेव गौतमयात प्रधानमन्त्रीया दावेदार कथं न्ह्यःने यंकेत पुष्पकमल दाहाल, माधव नेपालपिंसं अज्याःगु तयारी याःगु खः । उकिं पार्टीया सचिवालयं माधव नेपालया अध्यक्षताय् संविधान संशोधन कार्यदल गठन याःगु खः । थ्व कार्यदल गठन याःगु हे खः लाकि मखु स्पष्ट मजुइकं नेता नेपालं उकिया दुजःपिं सुवास नेम्बाङ व खिमलाल देवकोटायात सःताः बैठक समेत च्वंगु खः ।

तर बैठकय् नेम्बाङं आःया इलय् संविधान संशोधन आवश्यक मखु धासें कार्यदल गठन याःगु खःसा व समेत भंग यायेमाः धइगु बिचाः तयादीगु खँ सीदुगु दु । नेम्बाङया थ्व धापूयात नेता नेपालं स्वयम् पार्टी अध्यक्षलिसें प्रधानमन्त्री केपी ओलीया हे ‘सन्देश’ तायेकाः थ्व मुद्दायात न्ह्यःने मयंकेगु मती तःगु खँ सूत्रं धाःगु दु ।

नेकपा सूत्रं धाःसा न्हापां वामदेव गौतमयात राष्ट्रिय सभाय् यंकेगु व वयां लिपा संविधान संशोधन यानाः राष्ट्रिय सभाया दुजः नं प्रधानमन्त्री जुइ दइगु प्रावधान तयेगु धकाः दुनं दुनं तयारी याःगु खँ धाःगु दु । थुकी प्रधानमन्त्री ओली थः धाःसा सहमत मजूगु खँ नं सूत्रं धाःगु दु । उकिं वय्कलं सुवास नेम्बाङ मार्फत थःगु ‘सन्देश’ छ्वयादीगु खः ।

नेम्बाङं फुक्क खँ खुलस्त मयासे गुपचुप ढंगं संविधान संशोधन यायेगु तरिका ठीक मजू धकाः नं थःगु खँ तयादीगु खः । संविधान संशोधन मजुल धाःसा वामदेव गौतम नं राष्ट्रिय सभाय् वनीगु सम्भावना म्हो जूगु खँ धाःगु दु ।

 

सम्बन्धित बुखँ

LEAVE YOUR COMMENTS