ने. सं. ११४४ कछलागा द्वादशी -

‘नेपाः चुनावय् हे वंसा बांलाः’

नेपाःया वर्तमान अवस्था बारे भारत सरकारया लाइन

येँ (नेपालभाषा टाइम्स) – संसद विघटन लिपा नेपालय् ब्वलंगु राजनीतिक अवस्था लिपा उत्तरी जःलाखःला देय् चीनया प्रतिनिधि मण्डल हे वयाः थःगु गतिविधि क्यना वंसां दक्षिणी जःलाखःला देय् भारत धाःसा आः तक मौन जुयाच्वंगु दनि । नेपाःया लिपांगु राजनीतिक अवस्था बारे भारतया धापू छु खः धइगु खँ आः तक प्रस्ट पिहां वःगु मदुनि । भारतं थ्व इलय् थःत तटस्थ क्यनेगु लागिं हे छुं कथंया गतिविधि मयाःगु सूत्रया दावी दु ।

अथे खःसां भारतया सरकार व सत्तारुढ दल भाजपाया नेतातय्सं धाःसा थ्व इलय् नेपाः चुनावय् हे वंसां जिउ धइगु धापू तयेगु यानाच्वंगु खँ सूत्रं धाःगु दु । भारतया सुं नं नेतातय्सं आः तक थःगु स्पष्ट धापू पित बिउगु मदुनि । अथे खःसां भारतया संस्थापन पक्षं नेपालय् आः जुयाच्वंगु राजनीतिक गन्जागोलं मुक्त जुइगु खःसा चुनावय् वनेगु हे बांलाइ धकाः बिचाः तयेगु यानाच्वंगु खँ सूत्रं धाःगु दु ।

प्रधानमन्त्री ओलीया पलाः लिपा विभाजन जुइत्यंगु नेकपायात हानं मिले यानाः फुसा संसद पुनर्स्थापना हे यायेगु धकाः चीनं याःगु कुतः विफल जूगु खँय् भारत लय्तायाच्वंगु सूत्रया दावी दु । छुं जुयाः नेपाः चुनावय् मवन धाःसा चीनया कुतः विफल जुइ धइगु नं भारतया विश्लेषण दु । नेपालय् चीनया कुतः विफल यायेगु लागिं नं चुनाव याके माःगु व नेकपा विभाजन याये माःगु आवश्यकता भारतं खंकाच्वंगु खनेदु ।

ओलीया सरकार क्वःदलेवं चीनं नेपालय् यानातःगु अरबौं तकाया लगानी विफल जुइगु ग्याःचिकु चीनयात जुयाच्वंगु दुसा भारतया लागिं वहे लसताया विषय जुयाच्वंगु नं सूत्रया दावी दु ।

चीनया पलाः युरोपयात नं मयः
संसद विघटन जुयाः सत्तारुढ दल नेकपा विभाजन जुइगु अवस्थाय् थ्यनेवं चीनया प्रतिनिधि मण्डल नेपाः वयाः याना वंगु गतिविधियात नेपाःस्थित थीथी युरोपियन देय्या राजदूततय्सं नं नकारात्मक रुपं काःगु खँ सीदुगु दु । युरोपियन देय्तय्गु कुटनीतिक ख्यलय् चीनया थ्व पलाःयात ‘नेपाःया आन्तरिक मामिलाय् हस्तक्षेप’ याःगु धइगु कथं व्याख्या जुयाच्वंगु खँ नं सूत्रं धाःगु दु । युरोपियन देय्तय्सं थुकियात ययेकाच्वंगु मदुसां सुनां नं उकी टिप्पणी धाःसा याःगु मदु । चीनं धाःसा थुकियात हस्तक्षेप यानागु मखु धकाः स्पष्टीकरण बीधुंकूगु दु ।