असोजं अन्तर्राष्ट्रिय मेयर सम्मेलन जुइगु
येँ – उपत्यका नगरपालिका फोरमं थ्व हे असोज महिनां अन्तर्राष्ट्रिय मेयर सम्मेलन याइगु जूगु दु । शुक्रवाः छगू पत्रकार सम्मेलन यासें फोरमया अध्यक्ष येँ महानगरपालिकाया मेयर विद्या सुन्दर शाक्यं थुकिया घोषणा यानादीगु खः । वइगु असोज २१ निसें २४ गते तक जुइगु थुगु सम्मेलनया निंतिं ३५० गुलिं मल्याक थीथी नगरया मेयरपिंत निमन्त्रणा यायेगु खँ मेयर शाक्यं धयादीगु दु ।
स्वनिगःया झिंच्यागू नगरपालिकात दुथ्याःगु थ्व फोरमं भिजिट नेपाल दँ २०२० या ई लाका थ्व सम्मेलन यायेत्यंगु खः । पत्रकार सम्मेलनय् न्ववासें मेयर शाक्यं मू यानाः प्यंगू उद्देश्य ज्वनाः थ्व सम्मेलन यायेत्यनागु खँ कनादिल ।
थुगु सम्मेलनय् विश्वया थीथी देय्या नगरप्रमुख, नीति निर्माता व योजनाविदतय् दथुइ शहरया दिगो रुपान्तरणय् चूलाःगु उपलब्धि व अनुभवया कालबिल यायेगु, शहरकरण सम्पदा संरक्षणलिसे प्रत्यक्ष सरोकार तइगु पर्यावरणीय मुद्दाय् समान धारणा दयेकेगु, सहरतय् दथुइ सामाजिक, सांस्कृतिक व आर्थिक क्षेत्रय् सहयात्राया सम्भाव्यता मालेत सहभागी सहरया मेयरपिनि दथुइ द्विपक्षीय व बहुपक्षीय संवाद यायेगु, समुदायया सशक्तीकरण व सुशासनया माध्यमं थीथी क्षेत्र, जाति, विचारय् न्यनाच्वंपिं जनतादथुइ सामाजिक सद्भाव, आपसी सम्मान व विश्वास अभिवृद्ध यायेगु मू लक्ष्य दुगु खँ मेयर शाक्यं धयादीगु दु ।
सम्मेलनय् आःयात फोरमय् दुथ्याःगु झिंच्यागुलिं नगरपालिकालिसे भगिनी स्वापू दुगु नगरया प्रमुखपिं, दक्षिण एशिया व दक्षिणपूर्वी एशियाया राजधानी लिसें मू मू शहर व युनेस्को व विश्व सम्पदाया सहरतय् संगठनय् आवद्ध सम्पदा सहरया नगरप्रमुख, नीति निर्माता व योजनाविद्तय्त निमन्त्रणा यायेगु जानकारी नं पत्रकार सम्मेलनय् बिउगु खः ।
थ्व सम्मेलन ताःलाकेगु निंतिं संस्कृतिविद् ओमचरण अमात्यया संयोजकत्वय् छगू विज्ञ पुचः नं गठन यायेधुंकूगु दु । विज्ञ पुचलय् दिनेश भुजु, पियुष अमात्य, दिलेन्द्र श्रेष्ठ व प्रमुल्लमान सिंह प्रधानपिं दुथ्यानाच्वंगु दु । पत्रकार सम्मेलनय् सम्मेलनया निंतिं आधिकारिक वेबसाइटं आइएमसी डट २०२ ०डट ओराजी डट एनपी नं सार्वजनिक याःगु खः । थ्व वेबसाइटय् सम्मेलनया बारे सुचं व जानकारी लिसें झिंच्यागुलिं नगरपालिकाया बारे जानकारी दइगु खँ धाःगु दु ।
LEAVE YOUR COMMENTS