चीनं छेँय् वनेगु अनुमति मबिउ

येँ – चीनय् दकलय् अप्वः कोरोना भाइरस न्यना–च्वंगु वुहान नगर व उकिया जःखः च्वनाच्वंपिं नेपाःमि विद्यार्थीतय्सं छेँय् लिहां वयेगु इच्छा याःसां चीन सरकारं उकिया अनुमति मबिउगु खँ सीदुगु दु । उमित उद्धार यानाः लित हयेगु लागिं चीनस्थित नेपाःया राजदूतावासं चीन सरकारयात इनाप याःबलय् आःयात मेथाय् नं ल्वय् सरे जुइफु धासें नेपाःमितय्त लिहां वनेगु वा मेथाय् च्वं वनेगु अनुमति मबिउगु खः ।

तर भारतं धाःसा अन च्वनाच्वंपिं भारतीय नागरिकतय्त अनं मेगु थासय् यंकेगु प्रक्रिया न्ह्यायेधुंकल धकाः भारतीय विदेश मन्त्रालयया प्रवक्तां धाःगु दु । भारतीय नागरिकत मेथाय् वनेत्यंसां नेपाःया नागरिकतय्त धाःसा अन हे थाका तःगुलिं थप चिन्ता ब्वलंगु दु । चीनय् कोरोना भाइरस पनेगु लागिं प्रशस्त कुतः याःसां उकिं कयाः सीपिनि ल्याः धाःसा ह्वात्त थहां वंगु दु । म्हीग तक सीपिनि ल्याः ८१ म्ह थ्यंगु खःसा म्हिगः सुथय् थ्व ल्याः अप्वयाः १०६ म्ह थ्यंगु दु ।

थौंकन्हय् मनूत पिहां मवःगु व अनया शिक्षण संस्था नं बन्द जूगुलिं वुहान नगर सुनसान जुयाच्वंगु दु । अन यातायात समेत बन्द यानातःगु दु । चीन सरकारं अनुमति मबिउगु हे कारणं यानाः वंगु वालय् सीम्ह छम्ह नेपाःमिया शव नेपाः हयेत नं थाकुयाच्वंगु खँ धाःगु दु । वुहानय् संक्रमण न्यना वनाः यातायात बन्द जुइवं वंगु वालय् हृदयाघात जुयाः छम्ह नेपाःमि सीगु खः । तर चीनं सुयातं पिहां वनेगु अनुमति मबिउगु कारणं शव तकं अन हे लानाच्वंगु खः ।

राजधानी येँ असुरक्षित
चीनय् न्यनावंगु कोरोना भाइरस येँय् मन्यनेमा धकाः सरकारं कडा निगरानी शुरु याःगु दु । खास यानाः त्रिभुवन अन्तर्राष्ट्रिय विमानस्थलं पिहां वइपिं प्रत्येक यात्रुयात आः ज्वरो जाँचे यानाः जक पित छ्वयेगु व्यवस्था याःगु दु । थ्व विमानस्थलं न्हिं ६ निसें ७ द्वः तक यात्रु येँय् दुहां वयेगु याइ । छुं जुयाः विमानं वइपिं यात्रुपाखें ल्वय् न्यना वन धाःसा उकिया न्हापांगु लिच्वः राजधानी येँय् हे लाइगु जूगुलिं थनया टेकु अस्पतालं कडा निगरानी तःगु खः । आः तक येँय् कोरोनाया शंका यानाः प्यम्ह विरामीया स्वास्थ्य जाँच याःगु दुसा उकी मध्ये निम्ह जक ‘पोजिटिभ’ पिहां वःगु खँ धाःगु दु ।