भारतीय सांसदया नेपाःयात अपमान याइगु ट्विट

यँे – भारतया दिल्ली विधान सभाया छम्ह सांसदं नेपाःया अपमान जुइकथं ट्विट यायेवं वया विरुद्ध सामाजिक सञ्जालय् तच्वःगु विरोध जूगु दु । आम आदमी पार्टीपाखें दिल्ली विधान सभाया सांसद जुयाच्वंम्ह अलका लाम्बां भारतया प्रधानमन्त्री नरेन्द्र मोदीयात व्यंग्य यायेगु झ्वलय् नेपाःया अपमान जुइकथं ट्विट याःगु खः ।

भारतय् जुइत्यंगु लोकसभा निर्वाचनया सन्दर्भय् मंगलवा सुथय् लाम्बां याःगु छगू ट्विटय् धयातःगु दु, ‘प्रिय भारतवासीपिं, कृपा यानाः थ्व पालय् प्रधानमन्त्री हे ल्ययादिसँ, चौकीदार ला नेपालं नं हयेफु । नेपाःया चौकीदार खुँ जुइमखु ।’भारतय् प्रधानमन्त्री मोदीयात विरोधीतय्सं ‘चौकीदार’ धकाः गिजे याइगु खः ।

मोदीयात लक्षित यानाः च्वःगु थ्व ट्विटं नेपाः व नेपाःमिया अपमान जूगु धकाः सामाजिक सञ्जालय् हे लाम्बा विरुद्ध तच्वःगु आक्रोस प्वंकूगु खः । लाम्बाया ट्विटयात जातिवादी जूगु व थुकिं नेपाःया अपमान याःगु धासें आक्रोस प्वंकूपिंसं धाःगु दु, ‘खय्त ला लाम्बाया बिचारं नेपाः व भारतया स्वापुतिइ छुं लिच्वः लाइ मखु, तर वं गुकथं च्वल उकिं नेपाःमिया भावनाय् ठेस लाकूगु दु ।

वयागु सोच गुलि चिब्या व जातिवादया विषं जायाच्वंगु दु धयागु खँ थुकिं सीदु ।’ सामाजिक सञ्जालय् तच्वःगु आक्रोश वयेवं लाम्बां थःगु ट्विट धाःसा चीकेधुंकूगु दु । लाम्बां थःगु धापुतिं नेपाःमियात दुःख जूगु व थःगु आशय नेपाःमिपिंत नुगलय् स्याकेगु मखु धासें माफी फ्वनाः
ट्विट चीकूगु खः । लाम्बां माफी फ्वंगु ट्विटयात पुलांम्ह प्रधानमन्त्री बाबुराम भट्टराईनं रिट्विट याःगु दु ।