नेकांय् गठबन्धनया विरोध
येँ (नेपालभाषा टाइम्स)-नेकपा माओवादीलिसे गठबन्धन याये मजिउ धकाः शुरुंनिसें माग याना वयाच्वंपिं नेपाली कांग्रेसया निम्ह महामन्त्रीतय्सं आः वइगु छुं नं तहया चुनावय् छुं नं कथं गठबन्धन याये मजिउ धकाः हानं प्रस्ताव हःगु दु ।
कांग्रेसया महामन्त्रीपिं गगन थापा व विश्वप्रकाश शर्मा आः जुइगु गुगुं नं तहया निर्वाचनय् चुनावी गठबन्धन याये मजिउ धकाः औपचारिक रुपं प्रस्ताव तःगु खः । कन्हय्निसें न्ह्याइगु पार्टीया महासमितिया बैठकय् न्ह्यब्वयेगु लागिं थापां तयार यानादीगु सांगठनिक व शर्मां तयार यानादीगु समसामयिक दस्ताबेजया मस्यौदाय् चुनावी गठबन्धनं पार्टीयात क्षति जूगु निष्कर्ष नं पिकयातःगु खँ सीदुगु दु ।
थ्व निगुलिं प्रस्ताव सहलहया नितिं वंगु बिहीवाः च्वंगु पार्टीया केन्द्रीय कार्यसमितया बैठकय् न्ह्यब्वःगु खः । थापा व शर्मा लिसें पार्टीया उपसभापति पूर्णबहादुर खड्कां नीति व सरकारपाखें अर्थमन्त्री प्रकाशशरण महतं नेपाःया अर्थतन्त्र बारे प्रस्ताव न्ह्यब्वःगु दु । थ्व फुक्कं दस्तावेजत केन्द्रीय कार्यसमितिं अनुमोदन यायेधुंकाः महासमितिया बैठकय् न्ह्यब्वइगु खँ धाःगु दु ।
पार्टीया महामन्त्रीतय्सं चुनावी गठबन्धनया विपक्षय् तःगु प्रस्ताव महासमितिं पारित यात धाःसा वर्तमान गठबन्धनयात कयाः तकं न्ह्यसः ब्वलने फइगु खँ धाःगु दु । अथे जूगुलिं कांग्रेसया संस्थापन पक्षं आः हे गठबन्धन यानाः वनेगु वा मवनेगु धइगु प्रस्ताव महासमितिया बैठकय् न्ह्यमब्वयेगु रणनीति दयेकाच्वंगु दु । आः हे गठबन्धन यायेगु वा मयायेगु धइगु निर्णय जुल धाःसा वर्तमान गठबन्धन त्वाःदलीगु सम्भावना संस्थापन पक्षं खंकाच्वंगु दु ।
महामन्त्री थापाया प्रस्तावय् वंगु निर्वाचनय् न्यादँया नितिं गठबन्धन सहित मत फ्वंगुलिं थ्व ई तक राजनीतिक इमान्दारिता न्ह्यब्वयेगु व वयां लिपा जुइगु चुनावय् गठबन्धन मयायेगु नीति पारित यायेमाः धकाः प्रस्ताव न्ह्यथनातःगु दु ।
थापां याःगु प्रस्तावय् निर्वाचनय् गुगुं नं दलं बहुमत हये मफइगु अवस्थाय् मंकाः नीति व ज्याझ्वः दयेकाः सरकार गठन यायेगु खँ स्वाभाविक जूसां नं निर्वाचन न्ह्यः हे तालमेल यायेगु उपयुक्त मजूगु तर्क बियातःगु दु । उकथं हे मेम्ह महामन्त्री शर्मां नं कांग्रेसया परम्परागत मतदातां मेगु चिंलय् मत बीत पार्टीं याःगु इनाप मययेकूगुलिं उमिगु विश्वास हाकनं कायेगु खःसा गठबन्धनय् वने मजिउगु प्रस्ताव यानातःगु दु ।
LEAVE YOUR COMMENTS