अप्वः जूपिं सचिवतय्त गन छ्वयेगु ?

येँ – सरकारं मन्त्रालय क्वपालाः झिन्हय्गू जक यायेवं मन्त्रालयविहीन जूवःपिं सचिवतय् व्यवस्थापनया निंतिं सहलह सुरु जूगु दु । सरकारं छगू मन्त्रालयय् हे निम्ह सचिव तयेगु खः ला धयागु विकल्प नं हयाच्वंगु खँ धाःगु दु । अथे मखुसा उमित प्रधानमन्त्री ज्याकुथी हे खटे याये वा संविधान कथं गठन जूगु थीथी आयोगय् छ्वयेगु धयागु विकल्प नं न्ह्यःने वयाच्वंगु खँ वातावरण मन्त्री लालबाबु पण्डितं धयादीगु दु ।

मेखे सरकारं हयाच्वंगु थ्व निगुलिं विकल्प धाःसा बांलाःगु मखु धयागु टिप्पणी नं सुरु जूगु दु । पुलांम्ह मुख्य सचिव राजेन्द्रकिशोर क्षेत्रीं छगू हे मन्त्रालयय् निम्ह सचिव तयेगु न्हापाया अनुभव नं बांलाः मजूगुलिं थ्व विकल्प उचित मजूगु खँ धाःगु दु । अथेहे आयोगय् नं सहसचिवया दरबन्दी दःसा गाःगुलिं सचिवतय् प्रतिष्ठाया कारणं नं आयोगय् छ्वये मजिउगु बिचाः पुलांम्ह मुख्यसचिव क्षेत्रीं तयादीगु दु ।

संघीयता न्ह्यः ३० गू तक मन्त्रालय दुगु खः । न्हूगु संविधान कथं संघीयता वयेधुंकाः अप्वः मन्त्रालय आवश्यक मदुगुलिं मन्त्रालय क्वपालाः १७ गू जक दयेकूगु खः । आः खारेजय् लाःगु मन्त्रालयया सचिवतय्त गुकथं व्यवस्थापन यायेगु धयागु खं सरकारया कपाः स्याकाच्वंगु खः ।
मन्त्री पण्डितं छुं ईया निंतिं छगू मन्त्रालयय् निम्ह सचिव नं तयेफुगु खँ धयादीगु दु । वय्कलं वरिष्ठ सचिवतय्त मन्त्रालयया जिम्मेवारी बियाः मेपिंत प्रधानमन्त्री कार्यालयया जिम्मेवारी नं बीफुगु खँ धयादीगु दु ।

थौंकन्हय् खारेजय् लाःगु ११ गू मन्त्रालयया सचिवत ज्या मदयेकाः च्वने मालाच्वंगु दु । थौंकन्हय् नेपाः सरकार मातहत खुगू दर्जनं मल्याक सचिवत दु । थुपिं मध्ये छुं छुं सचिवतय् सेवा अवधि थ्वहे आर्थिक दँय् क्वचाइगु जूगुलिं मेपिंत बढुवा मयासे सचिवतय् ल्याः नं म्हो यायेगु तयारी जुयाच्वंगु दु ।