परियत्ति शिक्षाया निंतिं येँ मनपाया ग्वाहालि

येँ – येँ महानगरपालिकां बौद्ध परियत्ति शिक्षा केन्द्रया निंतिं आर्थिक ग्वाहालि याःगु दु। येँ मनपां अखिल नेपाल भिक्षु महासंघपाखें संचालन जुयाच्वंगु परियत्ति शिक्षाया निंतिं आर्थिक ग्वाहालि याःगु खः ।

येँ मनपां परियत्ति शिक्षाया निंतिं आवश्यक सफू, पाठ्यसामग्री छपाई, नैतिक आचरण शिक्षा, परियत्ति उत्तीर्ण जूपिनिगु निंतिं ग्वसाः ग्वःगु दीक्षान्त समारोह ज्याझ्वः लगायतया निंतिं २३ गू लाख ख्वीन्याद्वः तका दां बराबरया ग्वाहालि याःगु खः । येँ मनपाया प्रमुख विद्यासुन्दर शाक्यं भिक्षु महासंघया नायः भिक्षु मैत्री महास्थविरयात उगु ग्वाहालि लःल्हानादीगु खः । उगु इलय् येँ मनपा प्रमुख शाक्यं थःपिंसं यानागु ग्वाहालिया ध्यबा सदुपयोग जुइ धइगु खँय् थः आशावादी दुगु धासें थुगु ग्वाहालिं परियत्ति शिक्षायात अझ विस्तार यायेगु ज्याय् नं ग्वाहालि जुइगु विश्वास प्वंकादिल ।

भिक्षु महासंघया नायः मैत्री महास्थविरं परियत्ति शिक्षाया निंतिं प्राप्त जूगु आर्थिक ग्वाहालिमध्ये थ्व आतकया हे दकलय् तःधंगु धनराशीया ग्वाहालि प्राप्त जूगु धासें थुकिं परियत्ति शिक्षायात विकास यायेत थप उर्जा प्राप्त जूगु धयाबिज्यात। येँ मनपापाखें परियत्ति शिक्षाया निंतिं थुलि तःधंगु मात्राय् धनराशी ग्वाहालि यानाः तःधंगु गुण याःगु धासें वसपोलं थुगु ग्वाहालि सहीकथं हे सदुपयोग यायेगु व थुगु ग्वाहालि यात स्वनिगलय् जक मखसे स्वनिगलं पिने च्वंगु परियत्ति केन्द्रयातयात नं अझ प्रभावकारी याना यंकेत ग्वाहालि जुइगु धयाबिज्यात ।

थौं स्वयां ५६ दँ न्ह्यः स्थापना जूगु परियत्ति केन्द्रपाखें दँय्दसं संचालन जुयाच्वंगु परियत्ति शिक्षाया निंतिं न्याद्वः स्वयां अप्वःसिनं आवेदन बियाः परियत्ति अध्ययन यायेगु याना वयाच्वंगु दु ।

सम्बन्धित बुखँ

LEAVE YOUR COMMENTS