२३ गू पुचःलिसे वार्ता याइगु

येँ – ल्वाभः ज्वनाः सशस्त्र आन्दोलन यानाच्वंगु थीथी नीस्वंगू विद्रोही पुचःतलिसे सरकारं वार्ता याइगु जूगु दु । वार्ताया निंतिं विप्लव नेतृत्वया नेपाल कम्युनिष्ट पार्टी व सीके राउत लिसें थीथी पुचःलिस स्वापू तयेगु ज्या जुइगु खँ धाःगु दु । तर सरकारं वार्ताया लागिं पहिचान याःगु थ्व फुक्कं पुचःया नां धाःसा सार्वजनिक याःगु मदुनि ।

प्रतिनिधिसभाया सांसद सोमप्रसाद पाण्डेया संयोजकत्वय् सरकारी वार्ता पुचः गठन याःगु खःसा उगु पुचलं सोमवाः थीथी पुचःयात वार्ताय् वयेत आह्वान याःगु खः । वार्ता पुचलं तत्काल प्यंगू पुचःलिसे वार्ता यायेगु तयारी यानाच्वंगु दु । थ्व फुक्कं पुचः मधेश आन्दोलन केन्द्रित पुचः जूगु खँ नं धाःगु दु ।

सरकारं वार्ता पुचः गठन यायेधुंकाः विप्लव नेतृत्वया पुचलं थ्व पुचःलिसे वार्ता यायेत अस्वीकार यानाच्वंगु दु । थःपिनि नेता व कार्यकर्तायात सरकारं ज्वंगु धासें विप्लवं वार्ता यायेत अस्वीकार याःगु खः । वार्ता याये न्ह्यः थः नेता कार्यकर्तायात त्वःतेमाःगु माग विप्लव पुचलं यानाच्वंगु दु । मेखे सीके राउतं नं वार्ताया बारे आधिकारिक धारणा पित बिउगु मदुनि ।