नां बागमति, केन्द्र हेटौंडा, कमल थापा सफल
येँ – प्रदेश नम्बर ३ या नां ‘बागमति’ व स्थायी राजधानी हेटौंडाय् तयेगु निर्णय नेपाल कम्युनिष्ट पार्टी (नेकपा) या सचिवालयं याःगु दु । लिसें थुकियात कयाः पार्टी दुने विवाद नं शुरु जूगु दु । पार्टी सचिवालयपाखें थ्व निर्णय यायेवं आः थुकियात थःपिंसं गय् यानाः कायेगु धकाः असहमत प्रदेश सांसदतय् दथुइ अनौपचारिक सहलह नं शुरु जूगु दु । स्वनिगः दुने च्वंपिं नेकपाया नेवाः सांसदतय्सं नं थुकियात माने याये मफइगु बिचाः तःगु दु । सचिवालयं निर्णय याःसां छक्वलं प्रतिक्रिया मबिसे उकियात हीके फइगु उपाय मालेगुपाखे नेवाः सांसदत सक्रिय जूगु खँ सीदुगु दु ।
नां कने चाहे मजूम्ह छम्ह सांसदं थनिंनिसें न्ह्याइगु ३ नम्बर प्रदेशया थःपिनि संसदीय दलया बैठकय् थुकिया विरोध यायेगु खँ कनादीगु दु । प्रदेशया राजधानी काभ्रेय् तयेमाःगु व प्रदेशया नां ‘नेपाल मण्डल’ जुइमाः धकाः प्रस्ताव हे दर्ता जुइधुंकूगुलिं सचिवालयं याःगु निर्णय थःपिंत अमान्य जुइगु खँ नं वय्कलं कनादिल ।
पार्टीया सचिवालयं याःगु निर्णय माने यायेत सांसदत बाध्य खःसां सांसदतय् अधिकार धाःसा पार्टीं कुण्ठित याये मजिउगु बिचाः नं वय्कलं तयादिल ।
पार्टीं थ्व निर्णय छु आधारय् याःगु खः धकाः सीकेत आः थःपिनि बिस्कं बैठक सःतेगु तयारी समेत जुयाच्वंगु खँ नं वय्कलं कनादिल ।
सचिवालयं याःगु निर्णय विरुद्ध पार्टी दुने हे सः तयेगु लागिं कुतः जुयाच्वंगु खँ नं वय्कलं कनादिल ।
प्रदेश सांसद चन्द्र लामां ‘नेपालभाषा टाइम्स’ लिसे खँ ल्हासें पार्टीया निर्णय संविधानं बियातःगु अधिकार कथं मजूगुलिं उकियात थःपिंसं माने याये मफइगु खँ कनादिल । हेटौंडाय् स्थायी राजधानी तये मजिउ धइगु पक्षय् बहुमत सांसद दुगु दावी यासें सांसद लामां धयादिल, ‘हेटौंडाय् राजधानी जूसा मकवानपुर जिल्लायात ला पाय्छि जुइ तर मेगु झिंछगू जिल्लायात समस्या जुइफु ।’
अथे सांसद विशाल खड्कां पार्टीया निर्णय गुगुं हालतय् नं माने याये मफइगु खँ धयादीगु दु । वय्कलं ३ नम्बर प्रदेशया राजधानी हेटौंडाय् तयेगु पार्टीया निर्णय अपरिपक्व जू धासें थुकिया विरुद्ध संविधानया प्रक्रिया कथं न्ह्याः वनेगु जुइ धयादिल । वय्कलं पार्टीया निर्णय बाध्यकारी मखु धासें संविधानं हे थःपिनिगु क्षेत्रय् निर्णय यायेगु अधिकार प्रदेशयात हे बियातःगु खँ नं कनादिल ।
संविधानय् हे प्रदेशया नामाकरण व स्थायी राजधानी ल्ययेगु निर्वाचनय् सांसदपिंत स्वविवेक प्रयोग यायेगु अधिकार बियातःगु जूगुलिं थुकी पार्टीं ह्वीप लगे याये मदइगु दावी नं वय्कलं यानादिल । वय्कलं न्ह्यःने धयादी, ‘पार्टीं गुगु निर्णय यात थुकिं पार्टीया लोकतान्त्रिक छबियात बुलुका बी ।’
प्रदेश सभाया दुई तिहाइ सांसद हेटौंडायात स्थायी राजधानी दयेके मजिउ धइगु खँय् स्पष्ट दु धासें पार्टीं याइगु निर्णय माने यायेत थःपिं बाध्य मजूगु खँ नं वय्कलं धयादीगु दु । वय्कलं प्रदेशया राजधानी बारे निर्णय यायेत थौं च्वनीगु कार्यव्यवस्था समितिं निर्वाचन कार्यविधि दयेकीगु व वयां लिपा पार्टीया सांसदतय् दथुइ गुकथं न्ह्याः वनेगु धइगु बारे सहलह जुइगु जानकारी नं बियादिल ।
अन्ततः कमल थापा सफल !
सत्तारुढ दल नेकपा सचिवालयं याःगु थ्व निर्णययात प्रदेश ३ या संसदं पारित यात धाःसा जुजुवादी पार्टी राप्रपाया नेता कमल थापाया लाइन सफल जूगु ठहर जुइगु खँ राजनीतिक विश्लेषकतय्सं धयाहःगु दु । प्रदेश ३ या नां ‘बागमति’ तयेगु व स्थायी राजधानी हेटौंडाय् तयेमाः धकाः दकलय् कडा रुपं सः तया वयाच्वंम्ह नेता कमल थापा खः । थापां राजतन्त्र दुगु इलय् हे याये मफयाच्वंगु ज्या आः गणतन्त्रया इलय् याकेत सफल जूगुयात राजनीतिक विडम्बनाया रुपय् काये मालीगु खँ नं विश्लेषकतय्सं धाःगु दु । नेकपाया थ्व निर्णयं हेटौंडावासीत धाःसा अतिकं लय्ताःगु दु ।
LEAVE YOUR COMMENTS